Kanadaning Alberta provinsiyasi hukumati kelgusi yili mustaqillik referendumini o‘tkazish mumkinligini e’lon qildi. Bu haqda The Economic Times nashri xabar bermoqda.
Provinsiya bosh vaziri Daniel Smitning aytishicha, agar petitsiyaga yetarli miqdorda imzo to‘plansa, mustaqillik masalasi ovozga qo‘yilishi mumkin. U shaxsan mustaqillik g‘oyasini qo‘llab-quvvatlamasligini ta’kidlasa-da, uning bayonoti provinsiya ayirmachilik kayfiyati kuchayishi fonida yangragan.
Ma’lum qilinishicha, vaziyatni Kanadaning AQSHga qo‘shilishi mumkinligi haqida bir necha bor aytgan Donald Tramp timsolidagi tashqi omil yanada murakkablashtirmoqda. Neft zaxiralariga boy Alberta tarixan federal markazga qarshi energetika siyosati bo‘yicha ziddiyatga kirishib kelgan. Hudu neft qazib olishni rivojlantirish tarafdori, Kanada hukumati esa “yashil” energetikaga e’tibor qaratmoqda.
Ta’kidlanishicha, mutaxassislar Smitning tashabbusini mustaqillikka qaratilgan haqiqiy qadam emas, balki Ottavaga bosim o‘tkazish vositasi sifatida baholashmoqda. Bunday urinishlar 2021-yilda ham bo‘lgan, ammo o‘shanda masala rivojlanmagan edi. Biroq, bu safar vaziyat bir necha omillar tufayli o‘zgarishi mumkin. Masalan, ajralishni yoqlovchi Alberta Respublikachilar partiyasining kuchayishi, yaqinda bo‘lib o‘tgan parlament saylovlarida konservatorlarning mag‘lubiyati va Trampning Kanada ichki ishlariga aralashish ehtimoli.
Sotsiologik ma’lumotlarga ko‘ra, Alberta aholisining atigi 30 foizga yaqini mustaqillik g‘oyasini qo‘llab-quvvatlamoqda. Shu bilan birga, Kanada separatizmining an’anaviy markazi hisoblangan Kvebek pozitsiyasida o‘zgarishlar kuzatilmoqda, u yerdagi hokimiyat Albertaning energetika loyihalariga qiziqish bildira boshlagan.
Tramp Kanada Qo‘shma Shtatlar tarkibiga kirishi kerakligini bir necha bor ta’kidlagan. Xususan, u Kanada AQSHning 51-shtati sifatida “ancha yaxshiroq” bo‘lishini aytgan.
Shuningdek, siyosatchi uning mamlakati Kanada tufayli har yili 200 milliard dollar yo‘qotayotganini va buning davom etishiga yo‘l qo‘ymasligini ta’kidlagan. Bundan tashqari, Tramp Kanadaning AQSH tarkibiga kirishi haqida fikr bildirganida, kanadaliklar uchun soliqlar va mudofaa sohasida sezilarli tejamkorlik afzallik bo‘lishi mumkinligini aytgan.
Izoh (0)