Germaniya kansleri Olaf Shols tashqi ishlar va mudofaa vazirlari Annalena Berbok hamda Boris Pistorius taklif etgan Ukrainaga 3 milliard yevrolik harbiy yordam ko‘rsatishni to‘xtatib qo‘ydi. Bu haqda ishonchli manbalarga tayanib, Der Spiegel xabar berdi.
Manbalarga ko‘ra, ikki vazir 2024-yil noyabr oyida hukmron koalitsiya tarqalib ketganidan so‘ng yangi moliyaviy yordam ustida ish boshlagan. Ular Kiyevga zarur qurol-yarog‘larni yetkazib berishni 23-fevralda bo‘lib o‘tadigan Germaniyadagi federal saylovlargacha kelishib olishni rejalashtirgan.
Yordam paketiga uchta IRIS-T havo hujumidan himoya tizimi, Patriot zenit-raketa tizimlari uchun snaryad va raketalar, o‘nta g‘ildirakli gaubitsalar, artilleriya o‘q-dorilari kiritilgandi. Ushbu yordam xarajatlarini rejadan tashqari ravishda parlamentning byudjet qo‘mitasi orqali amalga oshirish mo‘ljallangan. Ilgari ham Berlin Ukrainaga yordam berish uchun shunday yo‘l tutgandi.
Byudjet qo‘mitasiga murojaatida vazirlar so‘nggi oylarda Kiyevning jang maydonidagi ahvoli yomonlashganini ta’kidlagan. Shuningdek, Donald Tramp Oq uyga qaytganidan keyin AQSHning kelajakdagi yordami borasidagi noaniq istiqbollarni ko‘rsatib o‘tgan.
Biroq Sholsning idorasi bu tashabbusni qo‘llab-quvvatlamasligini ma’lum qildi. Spiegel ma’lumotlariga ko‘ra, kansler “bo‘lajak federal hukumatni sodir bo‘lgan voqea qarshisida ko‘rishni istamaydi” va “tezkor harakatlarga ehtiyoj sezmaydi”.
Kanselyariya bu yil Ukrainani qo‘llab-quvvatlash uchun Germaniya yetarli mablag‘ — taxminan 4 milliard yevro ajratishini ta’kidlagan. Bundan tashqari, Kiyev muzlatilgan Rossiya aktivlaridan olingan foyda hisobidan — AQSH va Yevropa ittifoqidan 50 milliard dollar miqdorida kredit olishni boshlaydi.
AQSHning Kiyevga yordami ikki asosiy yo‘l bilan amalga oshiriladi: Pentagon omborlaridan harbiy mol-mulkni jo‘natuvchi PDA tashabbusi va yangi uskunalarni sotib olishni nazarda tutuvchi USAI. Hozirgi ma’muriyat Baydenning muddati tugagunga qadar — 2025-yil 20-yanvargacha — Ukrainaga kelishilgan barcha mablag‘larni ajratish niyatida ekanini bir necha bor e’lon qilgan. Mazkur summa taxminan 9 milliard dollarga yetadi.
Izoh (0)