АҚШ президенти Дональд Трамп маъмуриятининг харажатларни ва давлат аппарати сонини қисқартириш бўйича саъй-ҳаракатларига қарамай, жорий молиявий йил бошидан бери АҚШ бюджети тақчиллиги 196 миллиард долларга ошган. Бу ҳақда Конгресс бюджет бошқармаси (CBО) ҳисоботида маълум қилинди.
Ҳисоботга кўра, октябрь апрель ойлари давомида федерал харажатлар ўтган йилнинг шу даврига нисбатан 342 миллиард долларга кўпайган. Асосий ўсиш мудофаа, иммиграция дастурлари ва ижтимоий мажбуриятларга тўғри келган. Даромад солиғи йиғими юқори бўлишига қарамай, шу давр мобайнида бюджет даромадлари атиги 146 миллиард долларга ошган.
“Мудофаа ва иммиграция харажатлари, шунингдек, ижтимоий таъминот ва соғлиқни сақлаш тизимларига давом этаётган босим жорий молиявий йил бошидан бери бюджет тақчиллигини 196 миллиард долларга оширди”, дейилади Конгресс бошқармаси ҳисоботида.
Таъкидланишича, мудофаа харажатлари 39 миллиард долларга, Ички хавфсизлик вазирлиги харажатлари эса 18 миллиард долларга ошган. Тақчилликка энг катта ҳиссани Social Security ва Medicare дастурлари бўйича тўловлар қўшган. Уларнинг умумий миқдори деярли 1,5 триллион долларга етиб, ўтган йилга нисбатан 70 миллиард долларга кўп бўлган.
Ушбу кўрсаткичлар фонида Трамп маъмурияти камида 2 триллион долларлик харажатларни қисқартириш режаларини ўз ичига олган солиқ ва иммиграция бўйича кенг кўламли қонун лойиҳасини қабул қилишга ҳаракат қилмоқда.
Трамп қарори билан ташкил этилган АҚШ Давлат самарадорлиги департаменти (DOGE) “беҳуда сарф-харажатларни камайтириш ва федерал агентликларни қайта ташкил этиш” мақсадида тузилган.
Қўшма Штатлар молия вазири Скотт Бессент 16 январда Америка ҳукуматининг федерал харажатлари тинчлик даврида мисли кўрилмаган даражага етганини ва бюджет тақчиллиги ЯИМнинг 6,8-7 фоизини ташкил этаётганини маълум қилди. У Америка молиявий сиёсатининг ҳозирги ҳолатини “назоратдан чиқиб кетган” деб баҳолаб, эҳтимолий оқибатлардан ташвишланаётганини билдирди.
Бундан ташқари, АҚШ Конгресси Вакиллар палатаси спикери Майк Жонсон 11 февралда DOGE АҚШ ҳукуматининг Конгрессдан рухсат олинмаган “ҳайратланарли” харажатларини аниқлаган, деб айтганди.
Изоҳ (0)