Бухоро вилоятининг Олот туманида Экология инспекторлари томонидан чўл ҳудудида рейд тадбирлари ўтказилди. Бу ҳақда Экология вазирлиги хабар берди.
Маълум қилинишича, Рейд давомида 3 нафар фуқаро УАЗ автомашинасида саксовул ўсимликларини олиб кетаётгани маълум бўлди.
Инспекторлар ҳуқуқбузарларни тўхтатишга ҳаракат қилганда қаршилик кўрсатиб, инспекторлар бошқарувидаги хизмат автомашинасига қасддан шикаст етказишган ҳамда воқеа жойидан қочиб кетган.
Ҳолат юзасидан прокуратура томонидан иш қўзғатилди ва йиғилган ҳужжатлар судга тақдим этилди. Туман суди томонидан мазкур ҳолат кўриб чиқилди.
Суд ҳукмига кўра, Маъмурий жавобгарлик тўғрисидаги кодекснинг 79-моддаси 1-қисмига (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) асосан 3 нафар фуқарога 41 млн 625 минг сўм зарар ва жарима қўлланди.
Шунингдек, хизмат машинасига 6 млн сўм зарар етказилгани аниқланди ва тўлиқ ундирилди.
Бухородаги саксовул ўғрилари
Сентябрь ойида Бухоро вилояти Жондор туманида саксовул буталарини синдирган фуқарога жарима қўлланилган эди. Фуқарога нисбатан 9 452 000 сўм жарима ҳамда табиатга етказилган зарар қўлланилганди.
Шунингдек, Бухоро вилоятида сентябрь—октябрь ойлари давомида саксовул билан боғлиқ 25 та ҳуқуқбузарлик аниқлангани ҳақида хабар берилганди.
Мазкур даврда 25 та ҳолатда табиатга 29 миллион 702 минг 400 сўм зарар етказилгани ҳисобланган ва 222 миллион 900 минг сўм жарима тайинланган. Ҳуқуқбузарлар жами 252 миллион 602 минг 400 сўм товон тўлашлари белгиланган.
Аввалроқ, Бухородаги чўллардан саксовул синдириб олиб кетаётган шахсларга қарийб 40 млн сўм жарима белгиланганди.
Изоҳ (0)