Ижтимоий тармоқларда Россия фуқароси эканлиги айтилаётган шахснинг ўзбекистонликларни итга тенглаштириб гапирган видеоси тарқалмоқда. Ушбу ҳолат ижтимоий тармоқларнинг ўзбек сегментида қатор муҳокамаларга сабаб бўлди.
Жумладан, экология вазири маслаҳатчиси, жамоатчилик фаоли Расул Кушербаев видеомурожаат қилди. Унинг айтишича, Ўзбекистон қонунчилигида миллатлараро адоват қўзғашга қаратилган ҳолатлар бўйича жавобгарлик мавжуд. Шу билан бирга, халқаро нормаларда ҳам инсоннинг келиб чиқишидан камситиш, ҳақорат қилиш, ноинсоний муносабат қилиш мумкин эмаслиги кўрсатилган.
“Бугунги рус жамиятининг аксарияти илгариги рус жамиятидек эмас. Бугун улар аламларининг, йўқотишларининг, мағлубиятларининг заҳрини кимга сочишни билмаётган жамият. Ва ҳарбий мафкура билан яшаётган жамият. Марказий осиёликларни, бир вақтлар колония қилиб босиб олиб фойдаланган бу халқ, кўпчилиги ҳали ҳам ўзининг шовинистик қарашларидан воз кечмаган. Жуда ҳам ҳурматли инсонлари, тенг муносабат қиладиган, зиёлилари бор. Шу билан бирга, миллатчилари ҳам уйғониб келяпти. Бугунги кунда уларнинг сафи кўпайиб боряпти.
Энди бир ками итга тенглаштириш қолганди ўзбекистонликларни. Бу сафар ҳам Ташқи ишлар вазирлигимиз журъатсизлик қилиб, мум тишлаб ўтирадиган бўлса, билмадим, бунақа ноинсоний, пасткаш муносабатнинг чегараси кўринмаяпти. Агар бизникилар бирортаси рус миллати вакилини итга, чўчқага ёки бирор нарсага тенглаштириб интернетга тарқаца, биласизми, қанақа жавобгарлик бўлади, қанақа реакция қилинади?!
Тошкентдаги мактабда рус тили ўқитувчиси билан боғлиқ муаммо келиб чиққанида Россия ТИВ вакили Мария Захарова чиқиб изоҳ сўраганди”, дейди Расул Кушербаев.
Унинг айтишича, бу ерда бутун миллат таҳқирланяпти, камситиляпти.
“Билмадим, шунда ҳам Ташқи ишлар вазирлигимиз индамай кузатиб, уларга пахта қўйиш билан овора бўлса, билмадим, эртага бундан баттар нарсаларга тенглаштирилади. Халқаро шартномаларимиз бор, давлатлараро муносабатлар бор. Биз келишганмиз-ку, ўртамиздаги ҳамма ҳамкорлик, савдо-иқтисодий алоқалар борми, ҳаммаси ўзаро тенглик, бир-бирини ҳурмат қилиш асосида бўлади, бир-биримизни камситмаймиз деганмиз. Давлатлараро муносабатларда тенгмиз, деб тан олинган-ку”, дея қўшимча қилади Кушербаев.
Расул Кушербаев россиялик сиёсатчилар қилаётган пасткаш муносабатларга Ташқи ишлар вазирлиги, ваколатли идоралар бирор марта нормал даражада муносабат қилмаганини айтиб ўтди.
“Ташқи ишлар вазирлигимиз ухламасдан, журъатни йиғиб чора кўрсин, шунда одамлар ҳам тинчланади”, дейди у.
Ўзбекистонда бўлиши номақбул деб топилган чет эл фуқаролари
Аввалроқ “Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида”ги қонунга Ўзбекистон халқининг шаънини, қадр-қимматини, тарихини таҳқирловчи оммавий чиқишларни ёки ҳаракатларни содир этган чет эл фуқароларининг ва фуқаролиги бўлмаган шахсларнинг “Ўзбекистон Республикасида бўлиши номақбул деб топилган чет эл фуқаролари ва фуқаролиги бўлмаган шахслар рўйхати”га киритилишини назарда тутувчи ўзгартиришлар киритилганди.
Чет эл фуқаросини ёки фуқаролиги бўлмаган шахсни рўйхатга киритиш Олий Мажлис Қонунчилик палатаси кенгашининг, Сенати кенгашининг, махсус ваколатли давлат органларининг тақдимига асосан амалга оширилади.
Рўйхатга киритилган чет эл фуқаросининг ёки фуқаролиги бўлмаган шахснинг Ўзбекистон ҳудудига киришига йўл қўйилмайди.
Тошкентдаги мактабда содир бўлган ҳолат
2024 йилнинг сентябрь ойида Тошкентнинг Чилонзор туманидаги 188-мактабда рус тили фани дарсида ўқитувчи 6-синф ўқувчисини урди. Ҳолат акс этган видео ижтимоий тармоқларда тарқалиб, кенг муҳокамаларга сабаб бўлди. Facebook’даги “Потребител.уз” гуруҳида ёзилишича, ўқитувчи рус синфига дарсни ўзбек тилида ўтган. Ўқувчи дарсни рус тилида ўтишни сўраган. Шундан сўнг видеода акс этган ҳолат юз берган.
Мария Захарова Россия Ўзбекистондан юз берган ҳодисага ҳуқуқий баҳо беришни ва болага нисбатан шафқатсизлик қилган айбдорга қарши чоралар кўришни сўраганини айтди. “Бу масалани диққат-эътиборимиз марказида тутамиз”, деди Россия Ташқи ишлар вазирлиги расмийси.
Тошкент шаҳар мактабгача ва мактаб таълими бошқармаси матбуот хизматининг маълум қилишича, болани урган аёл синов муддати билан мактабга ишга таклиф қилинган, видеодаги воқеа унинг дастлабки иш кунида содир бўлган. Воқеадан хабар топган ўқувчининг ота-онаси ҳуқуқ-тартибот идораларига мурожаат қилган.
Шу билан бирга, ушбу аёл бошқа бир қанча ҳуқуқбузарликлар содир этгани аниқланди. Қизи ўқийдиган бошқа мактабда мактаб директори ўринбосари бўлган аёлга жисмоний куч ишлатган, Миллий гвардия ва ИИО ходимларига нисбатан ғайриижтимоий муносабатда бўлиб, уларининг қонуний талабларини бажармасдан кескин қаршилик кўрсатган.
Бундай қилмиши учун унга 25 сентябрь куни 7 сутка маъмурий қамоқ жазоси, БҲМнинг 3 баравари (1 020 000 сўм) ва БҲМнинг 7 баравари (2 380 000 сўм) миқдорида жарима жазоси тайинланганди.
Изоҳ (0)