Европа Иттифоқининг дипломатик бўлими хориждаги 10 та ваколатхонаси фаолиятини қисқартиришга, 100 га яқин маҳаллий ходимни ишдан бўшатишга тайёргарлик кўрмоқда. Бу ҳақда Politico хабар берди.
Бу бюджет маблағларининг қисқариши ва кенг миқёсли ташкилий ўзгаришлар доирасида қабул қилинади. Шу билан бирга Россияга қарши санкцияларга риоя қилишга ёрдам берадиган мамлакатларда делегациялар кучайтирилади. Европа Иттифоқининг дипломатияси раҳбари Кая Каллас 14 май куни Европа ташқи ҳаракатлар хизматини қисқартириш режасини тақдим этди.
2026 ва 2027 йилларга мўлжалланган режага кўра, 144 та ваколатхонанинг 10 тасидаги ходимлар сони қисқартирилади. Фақат элчи ва бир-икки ёрдамчи қолиши режалаштирилмоқда. Жами 100 га яқин маҳаллий ходим ишдан бўшатилиши мумкин.
Хорижий делегацияларнинг ҳеч бири ёпилмайди, аммо қолган ходимлар масофадан ишлашга ўтади, бу эса, ваколатхоналарни ёпиш билан баробар, дейди Politico суҳбатдошлари.
Европа Иттифоқи илгари ривожланишга ёрдам беришга интилган мамлакатларда, масалан, Беларусь ёки Лесотода ваколатхоналар қисқартирилади. Ушбу ўзгаришлар доирасида Европа Иттифоқининг айрим хорижий ваколатхоналари кўпроқ ходимларга эга бўлади. Европа Иттифоқи мудофаа бўйича ҳамкор бўлган мамлакатларда ўз ваколатларини кучайтиришга интилмоқда.
Расмийлардан бирининг айтишича, юқоридаги ислоҳот биринчи йилда Евроиттифоқига 20 миллион еврога тушади, кейинги уч йил давомида эса ҳар йили 9 миллион еврогача тежашга сабаб бўлади.
2011 йилда ташкил этилган Европа Ташқи ҳаракатлар хизмати (EEAS) дастлаб ривожланиш учун ёрдам ва иқтисодий ҳамкорликка йўналтирилган бўлиб, ўша пайтда фақат бир неча ўнлаб ходимга эга эди. Кейинчалик Евроиттифоқ ўз глобал таъсирини кенгайтириш мақсадида хизматни бутун дунё бўйлаб 5 200 дан ортиқ ходим билан кенгайтирди. Делегациялар маҳаллий ҳукуматлар билан алоқаларни ўрнатиш, Евроиттифоқ маблағлари ва грантларини тақсимлаш, шунингдек, баъзида можароли ҳудудлардаги вазиятлар ҳақида ҳисобот бериш каби вазифаларни бажаради.
Изоҳ (0)