Йирик миқдорда пулни ўзлаштириш ёки растрата йўли билан талон-торож қилишда айбланган Ўзбекистон фуқароси Россияда қўлга олинди. Бу ҳақда 14 май куни Россия ИИВ матбуот хизмати хабар берди.
Қайд этилишича, ушбу шахс бошқарган хусусий компания пахта етиштириш учун банкдан 9 миллион доллар кредит олган. У қишлоқ хўжалиги маҳсулотларини сотишдан қарийб 20 миллион доллар фойда олиб, қарз маблағларини қайтариш бўйича мажбуриятларини бажармай, хорижга қочиб кетган.
Ўзбекистон Интерпол миллий марказий бюросидан айбланувчининг Россияга келиши эҳтимоли ҳақида маълумот олингач, самолёт қўнгандан сўнг у дарҳол “Внуково” аэропортида ҳуқуқ-тартибот идоралари томонидан ушланган ва ўша куниёқ Ўзбекистонга экстрадиция қилинган.
2024 йил декабрида Россия Қозоғистонга 7 миллион долларлик фирибгарлик ишида гумонланаётган ўзбекистонлик аёлни экстрадиция қилганди. 2025 йил февралида ўғрилик ва катта миқдорда товламачилик жиноятларини содир этганлик учун халқаро қидирувга берилган шахс Мисрдан Ўзбекистонга экстрадиция қилинганди. Бухорода фирибгарлик содир этиб қочиб юрган ўзбекистонлик март ойида Россияда ушланганди. Ўша ойда Тошкентда бир неча кишини калтаклаган эркак Қозоғистонда қўлга олиниб, Ўзбекистонга экстрадиция қилинганди.
Изоҳ (0)