Россия Қозоғистонга 7 млн долларлик фирибгарлик ишида гумонланаётган ўзбекистонлик аёлни экстрадиция қилди. Бу ҳақда Қозоғистон Бош прокуратураси матбуот хизмати хабар берди.
Қайд этилишича, гумонланувчи 2005 йилдан 2007 йилгача Олмаота қурилиш компаниясида бухгалтер бўлиб ишлаган. У ҳужжатлар билан қайд этилмаган қалбаки квитансияларни ёзган. Унинг ҳаракатлари натижасида 80 киши жабр кўрган ва зарар миқдори 3,7 млрд тенгедан (7 млн доллар) ошган.
Гумонланувчи жиноят содир этилгандан сўнг яширинган ва шундан кейин халқаро қидирувга берилган.
Таъкидланишича, Россия ҳуқуқ-тартибот идоралари 2023 йил охирида Краснодар вилоятида ўзбекистонлик аёлни қўлга олган.
Айни вақтда гумонланувчи тергов изоляторига жойлаштирилган. Қозоғистон қонунчилигига кўра, у қилган жинояти исботланса, 5 йилдан 10 йилгача озодликдан маҳрум этилиши ва мол-мулки мусодара қилиниши мумкин.
Изоҳ (0)