Рим папаси Франциск инсульт ва юрак етишмовчилиги оқибатида вафот этди. Ватикан эълон қилган расмий ўлим гувоҳномасида бу ҳақда маълумот берди.
Ўлим сабаби сифатида инсульт, ундан кейин кома ва “қайтмас юрак-қон томир коллапси” кўрсатилган. Ватикан шифокори томонидан берилган ўлим тўғрисидаги гувоҳномага кўра, Франциск эрталаб соат 7:35 да ўзи яшаган Cаsa Santa Мarta’да вафот этган.
Шунингдек, Ватикан Рим папасининг 2022 йил 29 июнда ёзган васиятини ҳам эълон қилди. Унда понтифик Римдаги Авлиё Мария Мажора базиликасида дафн этилишни истагани, қабри тупроқда, содда, безакциз бўлиши ва фақат битта ёзув — “Франциск” деб ёзилиши лозимлигини таъкидлаган.
Рим папаси Франциск 21 апрель куни 88 ёшида вафот этди. Ўзбекистон президенти Шавкат Мирзиёев ҳамдардлик билдирди. Президент руҳоний ҳазратлари Ўзбекистон ва Ватикан ўртасидаги алоқаларни ривожлантириш, динлар ва конфессиялараро дўстликни мустаҳкамлаш, бутун жаҳонда муҳтож инсонларни қўллаб-қувватлаш, эзгу ғояларни кенг тарғиб этиш ишига муносиб ҳисса қўшганини таъкидлади.
Рим папаси февраль ойи ўрталарида бронхитни даволаш учун Римнинг “Жемелли” клиникасига ётқизилган. Сўнгра текширувлар икки томонлама пневмония бошланганини кўрсатган. Папа касалхонада 5 ҳафта ётган, тўрт марта нафас олиш инқирозини бошдан кечирган, унинг ҳаёти икки марта хавф остида қолган.
Папа 2013 йил Рим-католик черкови раҳбариятини ўз қўлига олганидан бери жами тўрт марта касалхонага ётқизилган. У 2021 йилда қорин бўшлиғида жиддий жарроҳлик амалиётини ўтказган. Бундан ташқари, 2023 йилда чандиқ тўқимасини ва қорин чуррасини даволаш мақсадида яна бир операцияни бошдан кечирган.
Ёшлигида папа касалликдан сўнг ўпкасининг бир қисмини олдириб ташлаган, шунинг учун тез-тез нафас йўллари касалликлари хуружидан азият чекарди. Францискнинг тиззасида ҳам муаммолар бор, шу сабабли у сўнгги йилларда ногиронлик аравачаси ва ҳассадан фойдаланганди.
Изоҳ (0)