88 ёшли Рим папаси Францискнинг соғлиғи сўнгги бир кеча-кундуз ичида ёмонлашди. Бу ҳақда Ватикан матбуот хизмати маълум қилди.
Унга кўра, понтифик “давомли астмага ўхшаш нафас қисиши”дан азият чекмоқда, шу сабабли уни юқори концентрацияли кислород билан таъминлашга тўғри келди. Бундан ташқари, Рим-католик черкови раҳбарига камқонлик фонида қон қуйиш муолажаси ўтказилди.
Ҳозирги пайтда Францискнинг аҳволи ҳамон оғирлигича қолмоқда, дея таъкидлади Муқаддас тахт матбуот хизмати.
Эълон қилинганидек, Рим папаси ҳали ҳам “хавфдан холи эмас”. У 21 февралга нисбатан кучлироқ оғриқни ҳис қилмоқда.
Кардинал Равази Францискнинг тахтдан четлатилишини истисно этмади
Аввалроқ кардинал Жанфранко Равази Corriere della Sera газетасига берган интервьюсида Франциск ўзининг соғлиғи туфайли вазифаларини бажара олмаса, худди ўтмишдоши Бенедикт XVI каби тахтдан воз кечиши мумкинлигини истисно этмаган эди.
Агар папа Франциск ўз вазифаларини бажаришда қийинчиликларга дуч келса, у ўз танловини амалга оширади, деди Равази.
Шу билан бирга, у Франциск бу йил Рим-католик черкови томонидан нишонланаётган умидга бағишланган насронийликнинг юбилей йилини охирига етказишни хоҳлаётганини айтди.
Бу унинг учун муҳим, дея қўшимча қилди кардинал.
Рим папасининг касалхонага ётқизилиши
Рим папаси Франциск жорий йилнинг 14 февраль куни бир неча кунлик нафас олишдаги қийинчиликдан сўнг енгил иситма билан Римдаги касалхонага ётқизилган. Ёшлигида ўпкасининг бир қисми олиб ташланган понтифик бир ҳафтадан буён нафас олиш билан боғлиқ муаммолардан азият чекмоқда. 18 февраль куни унга икки томонлама ўпка яллиғланиши ташхиси қўйилгани маълум бўлди.
2023 йилнинг март ойида у бронхит туфайли шифохонада уч кеча ўтказди. Соғлиғидаги муаммоларга қарамай, Франциск расмий учрашувларда қатнашишни давом эттирди, ҳатто чет элларга узоқ сафарларга чиқди.
2024 йил сентябрь ойида у 12 кун саёҳат қилиб, Осиёнинг жами 4 та мамлакатига ташриф буюрди. Давомийлиги ва масофаси нуқтайи назаридан бу сафар унинг деярли 12 йиллик фаолияти давомидаги энг узоқ саёҳат бўлди.
Изоҳ (0)