Рим папаси Франсиск Украинадаги вазият бўйича “оқ байроқ кўтариш ва музокаралар олиб бориш”га чақирди. Украина президенти Владимир Зеленский мазкур чақириққа жавоб қайтарди. Бу ҳақда BBC хабар берди.
Рим папаси “Украинада баъзилар жасорат топиб, таслим бўлишга, оқ байроқ кўтаришга чақираётгани” ҳақидаги хабарларга муносабат билдирди.
“Менимча, вазиятни кўрган, халқни ўйлайдиган, музокаралар олиб бориш учун оқ байроқ жасоратига эга бўлган киши кучлироқдир. Бугун эса хорижий кучлар ёрдамида музокаралар олиб бориш мумкин. Муваффақиятсизлигингиз, ишлар яхши кетмаётганини кўрсангиз, музокаралар олиб бориш учун жасоратга эга бўлишингиз керак.
Сизга уятли бўлиши мумкин, лекин бунинг охири қанча ўлим билан тугайди? Ўз вақтида музокаралар олиб боринг, қандайдир воситачи давлатни қидиринг. Бугун, масалан, Украинадаги урушда воситачи бўлишни хоҳлайдиганлар кўп. Бунинг учун Туркия ўзини таклиф қилди ва бошқалар ҳам. Вазият ёмонлашмасдан олдин музокара қилишдан уялманг”, — деган Рим папаси.
Зеленский муносабати
Украина президенти Россиянинг кенг кўламли босқин бошланганидан кейин насронийлар, мусулмонлар ва яҳудийлар Украинани ҳимоя қила бошлаганини айтди. У фронтда аскарлар билан бирга бўлган, уларни ибодат, сўз ва амал билан қўллаб-қувватлаётган ҳар бир украиналик руҳонийга миннатдорлик билдирди.
“Мен армия, мудофаа кучларида бўлган ҳар бир украиналик руҳонийга миннатдорлик билдираман. Улар фронтда ҳаёт ва инсониятни ҳимоя қиладилар. Ибодат, суҳбат ва амал билан қўллаб-қувватлайдилар. Одамлар томонда бўлган черков шундайдир. Икки ярим минг километр узоқликда яшашни хоҳлайдиганлар ва сизни йўқ қилишни хоҳлайдиганлар ўртасида виртуал воситачилик билан шуғулланиш эмас”, — деган у.
Украина ТИВ муносабати
Украина ташқи ишлар вазири Дмитрий Кулеба “Энг кучли шахс яхшилик ва ёмонлик ўртасидаги курашда эзгулик тарафини олган ва музокаралар деб атаб, уларни тенглаштиришга уринмайдиган одам” эканини айтди.
Кулеба Ватиканнинг Иккинчи Жаҳон уруши давридаги позициясига ҳам ишора қилди, ўшанда Папа Пий, баъзи тарихчилар фикрига кўра, нацистлар томонидан яҳудийларнинг оммавий ўлдирилиши ҳақида билган, аммо ҳеч нарса қилмаган.
“Мен сизни тарихий хатоларни такрорламасликка, Украина ва унинг халқини ўз ҳаёти учун адолатли курашда доимий равишда қўллаб-қувватлашга чақираман. Байроғимиз кўк ва сариқ рангда. Унинг остида биз яшаймиз, ўламиз ва ғалаба қозонамиз. Биз бошқа байроқларни кўтармаймиз”, — дейди Украина ташқи ишлар вазири.
Айрим хорижий етакчилар ҳам Франсискнинг сўзларига муносабат билдирган. Аҳолиси асосан католиклар бўлган Польша ташқи ишлар вазири нега папа Владимир Путинни Россия армиясини Украина ҳудудидан олиб чиқиш учун жасоратга эга бўлишга чақирмаётганини сўраган.
Изоҳ (0)