Рим Папаси Францискнинг соғлиғи барқарор, бироқ “ҳали ҳам хавф остида” дея баҳоланмоқда. У дастлаб эҳтиёж сезган ўпка вентиляциясидан узоқ вақт фойдаланмаган, бу эса унинг ўпка функцияси яхшиланаётганидан далолат беради. Ҳозирда у икки томонлама зотилжам билан курашмоқда.
Ватикан шанба куни берган сўнгги баёнотида Францискда энди бронхоспазм хуружлари кузатилмаётгани ҳақида маълум қилди. Шунингдек, унда иситма ёки янги инфекция белгилари йўқлиги, мустақил равишда овқатланаётгани ва нафас йўллари учун физиотерапия олишни давом эттираётгани билдирилди.
88 ёшли Папада узоқ вақт давомида сунъий нафас олиш аппарати орқали юқори оқимли кислород билан нафас олган бўлса ҳам қон таркибидаги газ миқдори нормал бўлиб қолмоқда. Бироқ унинг соғлиғи бўйича прогноз ҳали ҳам эҳтиёткорона баҳоланмоқда, яъни у хавфдан тўлиқ чиқиб кетмаган, дея қайд этди Associated Press.
Рим папасининг касалхонага ётқизилиши
Рим папаси Франциск жорий йилнинг 14 февраль куни бир неча кунлик нафас олишдаги қийинчиликдан сўнг енгил иситма билан Римдаги касалхонага ётқизилган. Ёшлигида ўпкасининг бир қисми олиб ташланган понтифик бир ҳафтадан буён нафас олиш билан боғлиқ муаммолардан азият чекмоқда. 18 февраль куни унга икки томонлама ўпка яллиғланиши ташхиси қўйилгани маълум бўлди. 23 февраль куни унинг аҳволи оғирлашган.
2023 йилнинг март ойида у бронхит туфайли шифохонада уч кеча ўтказди. Соғлиғидаги муаммоларга қарамай, Франциск расмий учрашувларда қатнашишни давом эттирди, ҳатто чет элларга узоқ сафарларга чиқди.
2024 йил сентябрь ойида у 12 кун саёҳат қилиб, Осиёнинг жами 4 та мамлакатига ташриф буюрди. Давомийлиги ва масофаси нуқтайи назаридан бу сафар унинг деярли 12 йиллик фаолияти давомидаги энг узоқ саёҳат бўлди.
Изоҳ (0)