Рим папаси Қозоғистон халқи учун дуо қилишга чақирди

Рим папаси Франсиск тошқиндан жабр кўрган Қозоғистон аҳолисига ҳамдардлик билдириб, улар учун дуо қилишга чақирди. Бу ҳақда “Orda.kz” хабар берди.

Франсиск 10 апрель куни Ватиканда умумий йиғилишда тошқиндан азият чеккан қозоғистонликлар ҳақида гапирди. Рим папаси католиклардан Қозоғистонда авж олган табиий офатдан жабр кўрганлар учун ибодат қилишни сўради. У 2022 йил сентябрь ойида Қозоғистонга ташриф буюрганини эслаб, республика халқига “маънавий яқинлик” ҳис қилишини билдирди.

“Тошқин натижасида 90 мингга яқин аҳоли эвакуация қилинишга мажбур бўлди. Ушбу табиий офат оқибатларидан азият чекканлар учун ибодат қилишга чақираман”, — деди Франсиск.

Сув тошқинлари сабабли Қозоғистоннинг ўнта вилоятида (Абай, Ақмўла, Ақтўбе, Атирау, Ғарбий Қозоғистон, Қарағанда, Қўстанай, Павлодар, Шимолий Қозоғистон ва Улитов вилоятлари) маҳаллий даражадаги фавқулодда ҳолат эълон қилинган.

Мавзуга доир: Қозоғистондаги сув босган шаҳардан фоторепортаж

Тошқин даври бошидан буён 72 мингдан ортиқ одам, жумладан, 17 мингдан ортиқ болалар эвакуация қилинган. 3702 та хусусий турар жой бинолари, 550 дан ортиқ ҳовлилар ва 1,8 мингдан ортиқ дала уйлари сув остида қолмоқда. Қутқарув ишларига жами 13,6 мингдан ортиқ киши, 1,3 минг техника ва 7 та самолёт жалб этилган. Қозоғистондаги йирик сув тошқинлари оқибатида 5,7 мингдан ортиқ турли қишлоқ хўжалиги жониворлари нобуд бўлган.

Қирғизистон сув тошқинидан жабрланган Қозоғистонга 300 тонна гуманитар юк жўнатган. Тожикистон ва Туркия эса сув тошқини оқибатларини бартараф этишда ёрдам таклиф қилган.