“Халқ банки” матбуот хизмати ижтимоий тармоқларда тарқалаётган “‘Халқ банки’ қолган пулни нима қиляпти?” мазмунидаги хабарларга раддия берди.
Банкнинг маълум қилишича, бола туғилганда бериладиган нафақа пуллари (суюнчи пули) белгиланган миқдордан кам берилаётгани ҳақидаги маълумотлар ҳақиқатга тўғри келмайди. Суюнчи пули президентининг тегишли фармонига асосан, меҳнатга ҳақ тўлашнинг энг кам миқдорининг 70,3 фоизи миқдорида белгиланади.
2025 йил 1 августдан бошлаб меҳнатга ҳақ тўлашнинг энг кам миқдори 1 271 000 сўм этиб белгилангач, суюнчи пули миқдори 893 513 сўм қилиб тўлаб берилмоқда. Мазкур нафақа Ижтимоий ҳимоя миллий агентлиги томонидан тайинланади ва молиялаштирилади.
“Халқ банки” эса ушбу маблағларни аҳолига етказиб беради. Фуқаролар суюнчи пулини илова орқали мустақил юклаб олиш имкониятига ҳам эга. Банк нафақа миқдорини белгилаш ёки ўзгартириш ваколатига эга эмас.
Шунингдек, илованинг янгиланиши ёки янгиланмаслиги бола туғилганда бериладиган нафақа миқдорига ҳеч қандай таъсир кўрсатмаслиги айтилди. Қайд этилишича, фарзанд 1 августга қадар туғилган бўлса суюнчи пули 811 365 сўм миқдорда тўланади, 1 августдан кейин туғилган бўлса суюнчи пули 893 513 сўм миқдорида берилади.
Ўзбекистонда 2025 йил июнь ойида 32 184 минг нафар фуқарога бир марталик нафақа тўловлари тўлаб берилди. Мазкур ойда 32 184 минг нафар фуқаро учун 37,2 млрд сўм бир марталик нафақа тўловлари тўлаб берилди. Шундан:
- 19 702 нафар фуқарога 15,9 млрд сўм — фарзанд туғилганда бериладиган бир марталик (суюнчи) нафақаси;
- 12 482 нафар фуқарога 21,3 млрд сўм — дафн этиш учун нафақаси тўлаб берилди.
Май ойида 30 401 нафар фуқарога бир марталик нафақа тўловлари амалга оширилганди. Умумий тўлов миқдори 36,7 миллиард сўмни ташкил этган. Бир ойда кўрсаткичда ортиш кузатилган.
Жумладан май ойида:
- 17 119 нафар фуқарога 13,9 миллиард сўм миқдорида янги туғилган фарзанд учун бир марталик суюнчи нафақаси;
- 13 282 нафар фуқарога эса 22,8 миллиард сўм миқдорида дафн этиш нафақаси тўлаб берилган эди.
2025 йил июнь ойида пенсия тайинлаш учун зарур иш стажига эга бўлмаган 7 146 нафар фуқарога нафақа, моддий ёрдам ва компенсация тўловлари тайинлаб берилди.
Изоҳ (0)