Алишер Навоий номидаги Кино саройида намойиш этилган «Устюртга йўл» номли бадиий фильм томошабинларда катта қизиқиш уйғотди. Бу ҳақда ЎзА хабар бермоқда.
Фильм Ўзбекистон Республикасида 2016 йилда ёшларга оид давлат сиёсатини амалга оширишга қаратилган чора-тадбирлар дастури ижросини таъминлаш мақсадида «Ўзбеккино» миллий агентлиги томонидан «Қорақалпоқфильм» киностудиясида суратга олинган.
Ушбу фильмда Қорақалпоғистон Республикасининг Қўнғирот туманидаги Устюрт газ-кимё мажмуаси қурилиши жараёнлари ҳақида ҳикоя қилинади. Олий ўқув юртини тамомлаган истеъдодли мутахассис Нодир бир гуруҳ тенгдошлари билан ана шу тарихий қурилишда иштирок этиш учун Устюртга йўл олади. Улар мураккаб табиатли бу масканда ишлаш жараёнида жиддий синовларни бошдан кечирса-да, ортга чекинмайди.
Фильм Қорақалпоғистон Республикаси, Хоразм вилояти, Тошкент шаҳри ва Жанубий Кореянинг Сеул шаҳрида тасвирга олинган.
Сценарий муаллифлари — Гулистон Матёқубова, Абдуқаюм Йўлдошев, Ғофир Шермуҳаммад. Саҳналаштирувчи режиссёр — Абдувоҳид Ғаниев. Фильмдаги асосий ролларни Акбархўжа Расулов, Адиз Ражабов, Шаҳзода Матчонова, Кўпжурсин Алланазаров каби актёрлар ижро этган.
Изоҳ (0)