Ижтимоий тармоқларда «Жиззахда ЙҲХБ билан ҳайдовчи уришиб кетди» номи билан тарқатилган видеоматериал ИИВ Йўл ҳаракати хавфсизлиги бош бошқармаси томонидан ўрганиб чиқилди.
Маълум бўлишича, 2019 йил 10 июнь куни соат 15.30 атрофида Жиззах вилояти ИИБ Йўл ҳаракати хавфсизлиги бошқармаси йўл-патруль хизмати инспектори С.Ғаниев Жиззах шаҳрининг «Халқобод» деҳқон бозори олдида хизмат олиб бораётганда «Жиззах—Учтепа» йўналиши бўйича ҳаракатланиб келаётган «ВАЗ-2101» русумли автомашина тўхтатади.
Аниқланган камчиликлар юзасидан инспектор С.Ғаниев ҳайдовчига маъмурий баённома расмийлаштираётганда шу ердан ўтиб кетаётган Нодир Иномов маст ҳолатда инспекторнинг хизмат вазифасига асоссиз аралашиб, унинг боши ҳамда баданининг турли қисларига қўллари билан ураётганда патруль-пост хизмати ходими ҳамда йўловчи шахслар томонидан бунга чек қўйилди ва у Жиззах шаҳар Ички ишлар органлари фаолиятини мувофиқлаштириш бошқармаси 2-сонли Ички ишлар бўлимига олиб келинди.
Жиззах вилояти наркология диспансери маълумотномасида Нодир Иномов «алкоголдан мастлик ҳолатида» эканлиги кўрсатилган.
Мазкур ҳолат юзасидан Жиззах шаҳар прокуратураси томонидан терговга қадар текширув ҳаракатлари олиб борилиб, 2019 йил 12 июнь куни Жиноят кодексининг 277-моддаси 3-қисми «г» банди билан жиноят иши қўзғатилиб, гумонланувчи Нодир Иномов Жиноят процессуал кодексининг 221-моддаси тартибида ушланиб, вақтинча сақлаш ҳибсхонасига жойлаштирилди.
Изоҳ (0)