Ижтимоий тармоқларда бир неча фуқаролар Labo’га сув тўлдириб, чўмилгани, овқатлангани акс этган видео тарқалди. Тошкент вилояти ЙҲХБ ҳолат юзасидан маълумот берди.
Унга кўра, Оққўрғон туманида ҳаракатланиб кетаётган автоуловнинг юкхонасида турли ҳил ҳаракатларни амалга ошириб, жамиятда юриш-туриш қоидаларини қасддан менсимаган ва жамоат тартибини бузган, шунингдек, бу ҳолатларни тасвирга олиб, ижтимоий тармоққа жойлаган фуқороларга 12 сутка маъмурий қамоқ жазоси белгиланди.
“Чойхонамизни негатив видео орқали реклама қилмоқчи эдик. Ҳаммадан узр сўраймиз. Ички ишлар ходимлари ошхонамизга келиб, бизни олиб кетди, тавбамизга таяндик. Бошқаларга тавсия этмаймиз”, дейди фуқаролардан бири.
Шу каби ҳолат Тошкентда ҳам кузатилган. Тошкентда машина салонини целлофан пакет билан ўраб, ичига сув тўлдириб ҳаракатланган шахслар ушланганди.
Ҳайдовчи транспорт воситасини бошқарганда одоб-ахлоқ қоидаларини бузгани, транспорт воситаси салонини целлофан пакет билан ўраб, ичига сув тўлдириб ҳаракатлангани аниқланган.
“Шеригим билан машина ичига сув тўлдириб ҳаракатланганимизнинг видеосини Instagram саҳифамизга қўйгандим. Видеони кимдир тарқатиб юборибди, қонунбузарлик ҳолати борлигини билмагандик. Инспектор ходимлари чақиртириб, тушунтириш ишларини олиб борди. Бу ҳолатни тавсия қилмайман ва узр сўрайман”, дея узр сўраганди ҳайдовчи.
Изоҳ (0)