Жиззахда бедарак йўқолган 2 ёшли бола ўлик ҳолда топилди. Бу ҳақда “Дарё”га Бош прокуратура матбуот хизмати хабар берди.
Хоразм вилояти Урганч шаҳрида яшаган бола 23 июнь куни ота-онаси билан Жиззах вилояти Зомин тумани Дуоба ҚФЙга келган ва шу куни соат 19:30 ларда номаълум томонга чиқиб кетиб йўқолганди. Уни топишда ёрдам берганлар учун 20 миллион сўм мукофот пули эълон қилинганди.
Бош прокуратура берган маълумотга кўра, боланинг мурдаси Зомин тумани Ўриклисой қишлоғининг аҳоли яшаш жойидан 1,5 километрдаги узоқликдаги тоғнинг сўқмоқ йўлида жароҳатлар билан топилган.
Олиб борилган тергов-тезкор ҳаракатлари натижасида уни шу қишлоқда яшовчи фуқаро автомашинасини орқага ҳайдаган вақтида орқа томони билан уриб кетгани аниқланган. Ҳайдовчи бола нафас олмаётганини билиб, яшаш уйининг юқори қисмидаги дарага олиб бориб ташлаган.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган бўлиб, дастлабки тергов ҳаракатларини давом эттириш учун Жиззах вилоят ИИБ ҳузуридаги ТБга юборилган.
Жиноят кодексига кўра, транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлса, муайян ҳуқуқдан маҳрум қилиб, 7 йилгача озодликдан маҳрум қилиш билан жазоланади.
2024 йилнинг июлида Тошкентда бедарак йўқолган 6 ёшли бола жасади сув тўла қудуқдан топилганди. 2023 йил мартида Самарқандда бедарак йўқолган бола бир йилдан сўнг топилганди.
Изоҳ (0)