Самарқандда ЙПХ ходимининг қонуний талабига бўйсунмасдан инспекторнинг ҳаёти учун хавфли ҳаракатлар содир этган ҳайдовчига жазо тайинланди. Бу ҳақда “Замон” информацион дастурида маълум қилинди.
1 январь куни Самарқанд шаҳар Буюк ипак йўли кўчасида хизмат фаолиятини олиб бораётган ЙПХ ходими давлат рақами белгисиз ҳаракатланиб келаётган Onix’ни жезл ва ҳуштак ёрдамида тўхтатиш чорасини кўрганда, ҳайдовчи ўзи ва ўзгалар ҳаётига хавф туғдириб, инспекторнинг қонуний талабига бўйсунмасдан, ходим устига ҳайдаб, тан жароҳатлари етказган ва воқеа жойидан қочиб кетганди. Ҳолат юзасидан жиноят иши қўзғатилиб, ҳайдовчи қамоққа олинганди.
Жиноят ишлари бўйича Самарқанд шаҳри судида айбланувчи ўша куни отаси маст ҳолатда онасига куч ишлатаётгани ҳақидаги хабарни эшитгандан сўнг уйга шошганини айтган ва айбидан пушаймон бўлиб, суддан енгиллик беришини сўраган.
ЙПХ инспектори эса судланувчига нисбатан даъвоси йўқлигини ва унга қамоқ билан боғлиқ бўлмаган жазо беришни сўраган.
Суд ҳайдовчини Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан айбли деб топди ва 3 йил муддатга озодлигини чеклади.
Жиноят кодексининг 219-моддаси 2-қисми — ҳокимият вакилига ёки фуқаровий бурчини бажараётган шахсга қаршилик кўрсатиш, қандай шаклда бўлмасин ўзининг хизмат вазифасини бажариш ёки фуқаровий бурчини бажаришдан воз кечишга, шунингдек қонунга хилоф ҳаракатлар содир этишга мажбур қилишда айбдор деб топилган шахс 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш билан жазоланади.
Изоҳ (0)