Тошкент вилояти Чиноз туманида ички ишлар органи инспекторининг хонасига рухсатсиз кириб, унинг қонуний талабларига бўйсунмасдан, қаршилик кўрсатган фуқаро 10 суткага қамалди. Бу ҳақда вилоят ИИББ ахборот хизмати хабар берди.
Маълум қилинишича, 21 апрель куни фуқаро А.Отажонов ўзининг Facebook ижтимоий тармоғидаги саҳифаси орқали тўғридан-тўғри эфирга чиқиб, қариндоши М.Холматов билан биргаликда ҳудудий ИИО ходимлари томонидан чақиртирилмаган бўлса-да, «Сарбозор» МФЙ идорасига (шу идорада ташкил этилган 29-сонли ҳуқуқ-тартибот масканига) кириб келган.
Хизмат хонасида бўлган профилактика инспектори Т.Норқулов фуқародан тасвирга олишни тўхтатишни талаб қилган. Профилактика инспектори бу вақтда унинг хизмат хонасида ўзаро низоли ҳолат юзасидан мурожаат билан келган бошқа фуқаролар борлиги ва улар билан ишлаётган вақтида фуқароларнинг шахсий даҳлсизлиги, уларнинг юзи, инспекторнинг хонасида экани, шахсий маълумотлари ошкор бўлишининг олдини олиш мақсадида тўғридан-тўғри эфирга узатишни тўхтатишини талаб қилган ва фуқаро қонуний талабни бажармагач, тасвирга олинишига чек қўйган.
Фуқаро А.Отажоновдан ИИО ходимлари томонидан чақиртирилмаган бўлса-да, нима масалада келганини ва ҳолат юзасидан тушунтириш сўралганда, у турли саволлар бериб инспекторнинг қонуний талабларига бўйсунмаган. Бошқа фуқароларнинг эътиборини жалб этган ҳолда инспекторга қаршилик кўрсатган.
Ҳолат юзасидан тўпланган ҳужжатлар асосида 23 апрель куни Тошкент вилояти ЖИБ Чиноз тумани судида, судья Р.Раҳимжонов раислигида суд мажлиси бўлиб ўтган.
Судда гувоҳларнинг кўрсатмалари А.Отажоновнинг оилавий аҳволи ва ўз айбига иқрорлиги инобатга олиниб, у Маъмурий жавобгарлик тўғрисидаги кодекснинг 194-моддасининг (ички ишлар органлари ходимининг қонуний талабларини бажармаслик) 1-қисми ва 195-моддасида (ички ишлар органлари ходимларининг ўз хизмат бурчларини бажаришларига қаршилик кўрсатиш) назарда тутилган ҳуқуқбузарлик содир этган деб топилган ва Маъмурий жавобгарлик тўғрисидаги кодекснинг 34-моддаси (бир неча ҳуқуқбузарликни содир этганлик учун маъмурий жазо қўлланиш) тартибида 10 сутка маъмурий қамоқ жазоси тайинлаш тўғрисида қарор қабул қилинган.
Аввалроқ Тошкент вилоятида ЙПХ инспекторига қаршилик кўрсатган Malibu ҳайдовчиси 5 суткага, Damas ҳайдовчиси эса 10 суткага, шунингдек, Тошкентда ички ишлар органлари ходимларининг формасида «макулатура» тўплаб юрган аёл ва эркак 10 суткага қамалгани тўғрисида хабар берилганди.
Изоҳ (0)