Қашқадарёда ЙПХ ходимлари билан жанжаллашган ҳайдовчи 14 суткага қамалди

Қашқадарё вилояти Яккабоғ туманида йўл-патруль хизмати ходимлари ва фуқаролар ўртасида тортишув юзага келгани хабар қилинганди. Йўл ҳаракати хавфсизлиги хизматининг маълум қилишича, қоидабузар шахсларга суд томонидан жазо тайинланган.

15 февраль куни соат 09:30 ларда Яккабоғ тумани Амир Темур кўчасида хизмат олиб бораётган ЙПХ ходими Б.Каримов томонидан Nexia-3 автомобили ҳайдовчисига хавфсизлик камаридан фойдаланмагани учун тўхташ ишораси кўрсатилган. Ҳайдовчи ишорага бўйсунмасдан ҳаракатда давом этган. Кўрилган чоралар натижасида ҳайдовчи тўхтатилган.

ЙПХ ходимлари томонидан қоидабузарлиги бўйича тушунтиришлар берилишига қарамасдан, ҳайдовчи инспекторларга фаол қаршилик кўрсатиб атрофдагиларнинг ҳам эътиборини мазкур вазиятга жалб этган. Жараён давомида атрофда бўлган айрим фуқаролар ЙПХ ходимларининг ўз хизмат фаолиятини бажаришига халақит берган.

Ҳайдовчи ва атрофдаги баъзи фуқаролар ходимларнинг хизмат вазифасини бажаришга халақит бергани ҳолати бўйича тўпланган ҳужжатлар 16 февраль куни жиноят ишлари бўйича Яккабоғ туман суди томонидан ўрганиб чиқилган.

Nexia-3 автомобили ҳайдовчиси Н.Х. (1990 йилда туғилган)нинг хатти-ҳаракатларида Маъмурий жавобгарлик тўғрисидаги кодекснинг 194-моддаси 1-қисми (ички ишлар органлари ходимининг қонуний талабларини бажармаслик) ҳамда 195-моддасида (ички ишлар органлари ходимларининг ўз хизмат бурчларини бажаришларига қаршилик кўрсатиш) кўрсатилган ҳуқуқбузарлик аломатлари мавжуд деб топилган. Унга нисбатан 14 сутка маъмурий қамоқ жазоси тайинланган.

Шунингдек, Ф.У. (1985 йилда туғилган) ҳамда А.Б. (1987 йилда туғилган)нинг хатти-ҳаракатларида Маъмурий жавобгарлик тўғрисидаги кодекснинг 194-моддаси 1-қисмида кўрсатилган ҳуқуқбузарлик аломатлари мавжуд деб топилган. Уларнинг ҳар бирига БҲМнинг 3 баравари миқдорида (810 минг сўм) жарима жазоси тайинланган.