Ўзбекистонлик ҳамширалар Баҳрайнга ишлаш учун юборилиши мумкин. Бу ҳақда “Дунё” хабар берди.
Келтирилишича, Ўзбекистон элчиси Нодиржон Турғунов (қароргоҳи Ар-Риёз шаҳрида жойлашган) Баҳрайн соғлиқни сақлаш вазири Жалила бинт ас-Саййид Жавод Ҳасан билан музокара ўтказди. Унда Ўзбекистон ва Баҳрайн ўртасида соғлиқни сақлаш соҳасида ҳамкорлик алоқаларини мустаҳкамлаш, мутахассислар алмашинувини йўлга қўйиш ва ҳамшираларни Баҳрайнга ишга жалб этиш истиқболлари кўриб чиқилди.
Вазир Жалила бинт ас-Саййид Жавод Ҳасан икки қардош мамлакатлар ўртасидаги муносабатларнинг бугунги ҳолати ҳақида гапириб, барча йўналишларда, хусусан тиббиёт соҳасида янада ривожлантириш учун ишга солинмаган салоҳият борлигини таъкидлаган.
Ўзбекистоннинг соғлиқни сақлаш соҳасида эришаётган ютуқлари, ёш кадрларни тайёрлаш бўйича самарали натижалари қайд этилди. Шунингдек, ушбу соҳада Ўзбекистон билан яқиндан ҳамкорлик қилишдан манфаатдорлик билдирилди.
Баҳрайн билан биринчи тиббий ёрдам кўрсатиш ва оилавий тиббиёт марказларида даволаш ишлари йўналишида тажриба алмашиш хусусида фикр алмашилди. Бундан ташқари, икки мамлакат соғлиқни сақлаш идоралари ўрасида англашув меморандумини ишлаб чиқиш ва имзолашни жадаллаштириш муҳимлиги таъкидланди.
Ўзбекистон ва Баҳрайн муносабатлари
Ўзбекистон билан Баҳрайндан расмий дипломатик алоқалар 1992 йил 29 майда Тошкентда қўшма коммюнике (баёнот) орқали ўрнатилган. Дипломатик, сиёсий, иқтисодий ва маданий соҳаларда юқори даражадаги мулоқот амалга оширилмоқда.
Ўзбекистонлик ҳамширалар АҚШга ишлаш учун юборилади
Бу ҳақда Миграция агентлиги директор ўринбосари Азимжон Ҳусанов ва New Future Succyess Academy халқаро ҳамшираларни тайёрлаш ўқув марказининг Ўзбекистондаги бошқарувчи менежери Фозилбек Хонхўжаев ўртасидаги учрашувда маълум қилинган. 2030 йилгача АҚШда 1 миллиондан ортиқ ҳамшираларга талаб мавжуд.
Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
Ўзбекистонлик ҳамширалар Қатарга ишга таклиф қилинмоқда
Жами иш ўрни 10 та, иш ҳақи ойига 2750 долларни ташкил этади. Иш уч сменали тизимда амалга оширилиб, ҳафтасига 48 соат, 6 кунни ташкил этади. Номзодлар учун шартлар: 18−50 ёш оралиғида бўлиш, тиббиёт соҳасида камида 2 йиллик иш стажига эга бўлиш ҳамда инглиз тилини мукаммал билиш.
Изоҳ (0)