Ўтган йили вазирлик тизимида мансабни суиистеъмол қилиш, пора олди-бердиси ва давлат маблағларини талон-торож қилиш билан боғлиқ жиноятлар улуши кўп бўлган. Бу ҳақда Сенат хабар берди.
Маълум қилинишича, 2024 йил давомида Соғлиқни сақлаш вазирлиги тизимида 500 дан ортиқ коррупцияга оид жиноятлар қайд этилган. Уларнинг катта қисми мансабни суиистеъмол қилиниш, пора олиш-бериш ва давлат маблағларини талон-торож қилиш билан боғлиқ. Шу билан бирга, давлат харидлари соҳасида ҳам қатор қонун бузилишлари ҳолатлари аниқланган.
Хабарга кўра, тиббиёт муассасаларида рақамлаштириш жараёнлари суст кетмоқда, кадрлар танқислиги, ишга қабул қилишда шаффофлик йўқ ва тиббий хизматлар сифати турлича.
“Коррупцияга қарши курашиш фақат жазо чоралари билан чекланиб қолмаслиги керак. Асосий мақсад – тизимда сезиларли ўзгаришларга эришиш, фуқароларнинг соғлиқни сақлаш тизимига ишончини мустаҳкамлашдир. Бунинг учун биринчи навбатда, ички назорат, очиқлик ва ҳисобдорликни таъминлаш лозим”, дея фикр билдирган Сенат раиси Танзила Норбоева.
Ўзбекистон 2024 йилда коррупцияни қабул қилиш халқаро индексида 180 та давлат орасида 121-ўринни эгаллаган. Умумий 100 баллик баҳолашдан бор–йўғи 32 балл тўплаган. Умуман олганда, 50 баллдан паст натижа давлатда коррупция юқори даражада эканини англатади.
Тадқиқотларга кўра, мамлакатда жамоатчилик кўпинча коррупцияни порахўрлик ва қариндош-уруғчилик деб тушунади. 50 фоиздан ортиқ респондент коррупция — бу мансабни суиистеъмол қилиш ва қариндош-уруғчилик, 40 фоиздан камроғи учун эса қимматбаҳо совғалар бериш деб тушунишини билдирган.
Изоҳ (0)