Ўзбекистонда 40-50 йиллик автомашиналарни босқичма-босқич истеъмолдан чиқариш таклиф этилди. Бу ҳақда “Миллий тикланиш” демократик партияси фракцияси раҳбари Алишер Қодиров маълум қилди.
Унинг билдиришича, 9 июль куни очиқ ва таҳлилий руҳда ўтган йиғилишда давлат раҳбари билан бир қатор тавсия ва ташаббуслар муҳокама қилинди.
“40-50 йиллик автомашиналарни босқичма-босқич истеъмолдан чиқариш — жуда тўғри таклиф. Ҳатто бу чекловни 25-30 йилга тушириш ҳам нотўғри бўлмайди, деб ўйлайман. Фақат машинани алмаштириш учун қулай таклифлар бўлиши керак”, деб ёзди депутат.
Видеоселектор йиғилишида вазирлик ва ҳокимлик бинолари олдига машинасини “парковка” қилган ходимлар жазоланиши маълум қилинганди. Алишер Қодиров давлат хизмат автоларига алоҳида эътиборни тақиқлашни маъқуллаб, тартиб ҳаммага бир бўлиш кераклигини айтди.
Йиғилишда “Сурункали қоидабузарлар” дастури ишга туширилиши, қарама-қарши ҳаракатланиш, чироқнинг қизил рангида ўтиш бир ой ичида 2 марта содир этилса ёки тезлик 5 марта оширилса 1 йилгача жаримадан чегирма берилмаслиги ҳам маълум қилинганди. Алишер Қодировнинг фикрича, тезлик учун чеклов жой, вақт ва заруратига қараб белгиланиши керак.
“Масалан, магистрал йўл, масофа узоқ, аҳоли яшаш пункти эмас, нега 130 юриш мумкинмас? Қизилда ўтиш, чекланган жойда икки карра тез юриш, авария хавфи яратиб қасддан тартибсиз ҳаракат… марҳамат, аёвсиз жаримани босиш керак, лекин айрим жазолар бўйича ҳайдовчиларнинг ҳам фикри билан қизиқиш зарур”, дейди депутат.
У Ички ишлар тизими ходимларини тайёрлаш бўйича ташаббусни ўринли ва оғриқли муаммо деб атади.
“Бу соҳада ишини яхши биладиган, ўқиган, ҳар томонлама жамиятга намуна бўладиган қоракўзлар ишлаши керак, вазирликдаги мансабдорнинг жиян ёки ҳамқишлоқлари эмас. Жамият формадаги ходимлар билан фахрланиши керак”, дейди “Миллий тикланиш” раҳбари.
Алишер Қодировнинг маълум қилишича, эндиликда қонунларни ўзгартириш бўйича маслаҳатлашувлар бошланади.
2030 йилга қадар Тошкент ва Нукус шаҳарлари, вилоятлар марказларида “Евро – 5” ва ундан юқори стандартларига мувофиқ бўлмаган автомашиналар эксплуатацияси босқичма-босқич чеклаш ҳам кўзда тутилган.
Изоҳ (0)