ДХХ Фарғонада сифати кафолатланмаган 8 млрд сўмлик дори воситалари ва 400 млн сўмлик тиббиёт жиҳозларининг савдога чиқарилиши олди олинганини маълум қилди.
Келтирилишича, Давлат хавфсизлик хизматининг Фарғона вилояти бўйича бошқармаси ҳамда вилоят божхона бошқармаси ходимлари ҳамкорлигида ўтказилган тезкор тадбирда Фарғона шаҳрида яшовчи фуқаро бошқарувидаги Nexia-3 Боғдод тумани ҳудудида тўхтатилиб, текширилди. Натижада автомашина салонида 8 турдаги 413 дона сифати кафолатланмаган дори воситалари борлиги аниқланди.
Шунингдек, Бағдод туманида жойлашган ва мазкур фуқарога тегишли бўлган 2 та омбор кўздан кечирилганда, сифат сертификатига эга бўлмаган жами 60 турдаги 100 минг 332 дона дори воситалари ноқонуний сақланаётгани аниқланиб, процессуал тартибда расмийлаштириб олинди.
Тезкор тадбир давом эттирилиб, Фарғона шаҳрида жойлашган омбордан эса ноқонуний сақланаётган 39 турдаги 16 897 дона дори воситалари ашёвий далил сифатида олинди. Ўтказилган тезкор тадбирлар давомида, дастлабки умумий қиймати жами 8 миллиард 1 миллион 429 минг сўмлик 117 минг 642 дона сифати кафолатланмаган дори воситалари вақтинча сақловга олинди.
Бу йўналишдаги тадбирлар давом этирилиб, Марғилон шаҳрида яшовчи фуқарога тегишли 3 та яширин омборда Қирғизистондан айланма йўллар орқали олиб келинган, умумий қиймати 400 млн сўмлик 15 турдаги катетер игна, жгут, электрон термометр, тонометр каби жами 30 минг дона тиббиёт жиҳозлари сақланаётгани аниқланиб, процессуал тартибда расмийлаштирилди.
Ҳозирда мазкур ҳолатлар бўйича терговга қадар текширув ҳаракатлари олиб борилмоқда.
2025 йилнинг бошларида Жиззахда 588 миллион сўмлик сифати кафолатланмаган дорилар сотувга чиқиб кетишининг олди олинганди.
2024 йил август ойида Андижонда ноқонуний дори воситалари савдоси билан шуғулланганларга ҳукм ўқилганди. Дори воситаларининг умумий қиймати 1 млрд 616 млн 802 минг сўмни ташкил қилган. Жиноят ишлари бўйича Қўрғонтепа туман суди томонидан фуқарога нисбатан 5 йил ҳамда шеригига нисбатан 3 йил муддатга озодликдан маҳрум қилиш жазоси тайинланган.
Изоҳ (0)