Хоразм вилояти Урганч шаҳрида дори воситаларини ноқонуний муомалага киритилишининг олди олинди, деб хабар бермоқда Прокуратура департаменти ахборот хизмати.
Унга кўра, ҳолат Бош прокуратура ҳузуридаги департаментнинг Хива тумани бўлими ходимлари томонидан ўтказилган тезкор тадбирда аниқланган. “Р.Ф.” хусусий корхонаси раҳбари Й.Р. тегишли рухсатнома олмасдан корхонага қарашли дорихонада дори воситалари ва тиббий буюмлар савдоси билан шуғулланиб келган.
855 турдаги жами 48 391 дона умумий баҳоси 239 млн сўмлик дори воситалари ва тиббий буюмлар ашёвий далил сифатида олинган.
Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
Ўзбекистонда йил бошидан буён 2,5 мингдан зиёд қалбакилаштирилган дорилар аниқланган эди. Тақдим қилинган дори воситалари ва тиббий буюмлар ўрнатилган тартибда лаборатория текширувидан ўтказилганда, таҳлиллар натижаларига кўра, ноқонуний муомалада бўлган:
- 5958 ўрам — давлат рўйхатидан ўтган ва мувофиқлик сертификати мавжуд;
- 17925 ўрам — давлат рўйхатидан ўтмаган ва мувофиқлик сертификати мавжуд бўлмаган;
- 557 ўрам — ёрлиқлаш кўрсаткичи бўйича номувофиқ (контрафакт);
- 1549 ўрам — яроқлилик муддати тугаган (сифатсиз);
- 2524 ўрам — қалбакилаштирилган умумий 52396 ўрам фармацевтика маҳсулотларининг тиббиёт амалиётида қўллаш мумкин эмаслиги юзасидан хулоса берилди.
Ушбу сифатсиз, қалбакилаштирилган ва Ўзбекистонга ноқонуний кириб келган фармацевтика маҳсулотлари айланмасининг олди олинди.
Изоҳ (0)