Президент қарори билан Ўзбекистонда фармацевтика соҳасини тартибга солиш бўйича янги талаблар белгиланди.
“Мажбурий рақамли маркировкалаш тизими самарадорлигини оширишга қаратилган қўшимча чора-тадбирлар тўғрисида”ги қарорга кўра, 2025 йил 1 июлдан импорт қилувчи ташкилот томонидан Ўзбекистонга олиб кирилган дори воситаларини уларнинг улгуржи ва чакана савдоси билан шуғулланувчи тадбиркорларга тўғридан-тўғри ёки унинг расмий дилерлари орқали сотиш электрон ҳисобварақ-фактура асосида амалга оширилади.
2025 йил 1 сентябрдан фармацевтика фаолиятини ҳамда дори воситалари ва тиббий буюмларни чакана сотиш фаолиятини лицензиялаш талаблари кучайтирилади.
Янгидан ташкил этилган субъектларга фаолиятини амалга ошириш учун кўчмас мулк бўйича ижара ёки текин фойдаланиш шартномаси солиқ органларида ҳисобга қўйилган бўлиши керак. Дори воситаларини сотишда харидорлардан тўловларни қабул қилишда электрон тўлов воситаларидан фойдаланиш имконияти яратилган бўлиши лозим.
Солиқ текширувларида кирим ҳужжатларисиз (контрафакт) ва маркировкаланмаган дори воситаларини сотиб олиш, ташиш ва сақлаш ҳолатлари аниқланса, солиқ органлари ташаббуси билан ваколатли орган томонидан тегишли субъект лицензиясининг амал қилиши тўхтатиб турилади.
Президент қарори билан, шунингдек дори воситалари ва тиббий буюмларни ишлаб чиқарувчи корхоналар томонидан агрегациялаш тизимини жорий қилиш муддати 2025- йилнинг 1 октябригача узайтирилди.
Рақамли маркировкалаш
Бу товар айланмасини назорат қилишнинг автоматлаштирилган тизими. Рақамли белгилар қоълланилиши маҳсулот ҳақидаги барча маълумотларни олиш имкониятини беради. Жумладан, ишлаб чиқарувчининг номи, тайёрланган товар ёки сотиладиган жой, сана ва вақт, яроқлилик муддати, стандарт рақами каби маълумотлар махсус код остига жойлаштирилади.
Вазирлар Маҳкамасининг 2022 йил 2 апрелдаги “Дори воситалари ва тиббий буюмларни мажбурий рақамли маркировкалаш тизимини жорий этиш тўғрисида”ги қарорига мувофиқ, мамлакатда дори ва тиббий маҳсулотларни рақамли маркировкалаш тизими босқичма-босқич жорий этилиши белгиланганди.
Изоҳ (0)