“Имудон” дори воситасининг контрафакт нусхасини ишлаб чиқарган корхона молиявий жаримага тортилди. Бу ҳақда Интеллектуал мулк департаменти хабар берди.
Қайд этилишича, Адлия вазирлигига Abbott Products Operations АG компанияси ўзига тегишли “Имудон” дори воситасининг контрафакт нусхаси сотилаётгани тўғрисида мурожаат қилди. Мурожаатга асосан белгиланган тартибда “А” МЧЖда текширув ўтказилганда Abbott Products Operations АG компаниясининг “Имудон” дори воситасига адаштириб юбориш даражасида ўхшаш бўлган “Нест Имудон” номи остида контрафакт дори воситаси ишлаб чиқарилаётгани аниқланди.
“А” МЧЖ илгари ҳам “Магне B6” дори воситасининг контрафакт нусхасини ишлаб чиқариш ва сотиш билан шуғуллангани учун корхона раҳбари С.Ф. маъмурий жавобгарликка тортилган эди. Бироқ корхона раҳбари С.Ф. тегишли хулоса қилмасдан ноқонуний ҳаракатларни содир этиб келган. Натижада “А” МЧЖга 68 миллион сўм молиявий жарима қўлланилди.
Маълумот учун, “Товар белгилари, хизмат кўрсатиш белгилари ва товар келиб чиққан жой номлари тўғрисида”ги қонунга кўра товар белгисидан ёки адаштириб юбориш даражасида у билан ўхшаш бўлган белгидан товарларда, товарларнинг этикеткаларида, ўровларида қонунга зид равишда фойдаланилганда улар контрафакт деб ҳисобланади.
Ўзбекистонда йил бошидан буён 2,5 мингдан зиёд қалбакилаштирилган дорилар аниқланган эди. Тақдим қилинган дори воситалари ва тиббий буюмлар ўрнатилган тартибда лаборатория текширувидан ўтказилганда, таҳлиллар натижаларига кўра, ноқонуний муомалада бўлган:
- 5958 ўрам — давлат рўйхатидан ўтган ва мувофиқлик сертификати мавжуд;
- 17925 ўрам — давлат рўйхатидан ўтмаган ва мувофиқлик сертификати мавжуд бўлмаган;
- 557 ўрам — ёрлиқлаш кўрсаткичи бўйича номувофиқ (контрафакт);
- 1549 ўрам — яроқлилик муддати тугаган (сифатсиз);
- 2524 ўрам — қалбакилаштирилган
умумий 52396 ўрам фармацевтика маҳсулотларининг тиббиёт амалиётида қўллаш мумкин эмаслиги юзасидан хулоса берилди. Ушбу сифатсиз, қалбакилаштирилган ва Ўзбекистонга ноқонуний кириб келган фармацевтика маҳсулотлари айланмасининг олди олинди.
Изоҳ (0)