Мадриднинг “Реал” клуби ёзги трансфер ойнаси вақтида ҳимоячи Давид Алаба билан хайрлашишни режалаштирмоқда. Бу ҳақда Испаниянинг АS нашри хабар берди. Манбага кўра, “қаймоқранглилар” 32 ёшли футболчини сотиш орқали иш ҳақи бюджетини қисқартириш ва молиявий имкониятларни кенгайтиришни мақсад қилган. Бироқ Алабанинг ўзи клубни тарк этиш ниятида эмас — у 2026 йил 30 июнгача амал қиладиган шартномасини охиригача бажариб, Жаҳон чемпионатига яхши формада етиб боришни истамоқда. Шунингдек, футболчининг келажаги соғлиғи ҳамда тикланиш жараёнига боғлиқ экани таъкидланмоқда. Июнь ойи охирида Алаба чап болдир мушагидан жароҳат олиб, бир ойга сафдан чиққан эди. Мавжуд маълумотларга кўра, Алаба Европадаги энг юқори маош олувчи ҳимоячилардан бири ҳисобланади. У “Реал”да Килиан Мбаппе ва Винисиус Жуниордан кейинги ўринда туради. Ҳимоячининг ҳафталик маоши 415 минг еврони, ойлик маоши 1,88 миллион еврони, йилига эса 22,6 миллион еврони ташкил қилади (солиқларсиз). Эслатиб ўтамиз, Алаба 2023 йил декабридан бошлаб тиззасидаги боғлам узилиши туфайли майдонга туша олмаган. Кейинчалик, февралда мушак, апрель ойида эса мениск тоғайи жароҳати туфайли яна операция ўтказган. Оқибатда у ўтган мавсумда атиги 14 та ўйинда иштирок этди. Унинг доимий жароҳатларга мойиллиги “Реал” раҳбариятини хавотирга солмоқда ва айнан шу омил футболчини трансферга қўйиш қарорига олиб келган.
Мавзуга доир
×![Lightbox Image]()
Изоҳ (0)