Япон олимлари денгиз сувида “бир неча соат ичида” эрий оладиган пластмасса ишлаб чиқди. Бу океанларнинг ифлосланиши муаммосини ҳал қилишда ёрдам бериши мумкин. Бу ҳақда Reuters хабар берди.
Ихтиро Физик-кимёвий тадқиқотлар институти ва Токио университети олимлари томонидан яратилган. У анъанавий пластикдан анча тез парчаланади ва ҳеч қандай из қолдирмайди.
Токио яқинидаги Вако шаҳридаги лабораторияда тадқиқотчилар пластикнинг кичик бўлаги бир соат давомида аралаштирилгандан сўнг шўр сувда ғойиб бўлганини намойиш этди, дейилади хабарда.
Лойиҳа раҳбари Такудзо Аида уларнинг тадқиқоти “сезиларли қизиқиш уйғотгани”ни таъкидлади. Олим бу пластмассанинг нефть асосидаги пластмасса каби мустаҳкам эканини, шунингдек, “заҳарли эмаслигини, ёнмаслигини ва карбонат ангидрид ажратмаслигини” айтди.
Кейинчалик бу таркибий қисмлар табиий бактериялар томонидан қайта ишланиши мумкин. Бу эса сувдаги ҳаётга зарар етказиши ва озиқ-овқат занжирига кириши мумкин бўлган микропластикларни ҳосил қилишдан сақлайди.
Болалар қайси сайёрада яшашларини танлай олмайди. Улар учун имкон қадар энг яхши муҳитни қолдириш — биз олимларнинг бурчи, дейди Аида.
Туз тупроқда ҳам мавжудлиги сабабли, тахминан, 5 сантиметр ўлчамдаги пластик бўлак қуруқликда 200 соатдан кўпроқ вақт ўтгач парчаланади.
Аиданинг қўшимча қилишича, бу материал устига махсус қоплама суртилгач, оддий пластик каби ишлатилиши мумкин. Ҳозирда олимлар айнан шу қоплама усулларини мукаммаллаштириш устида изланиш олиб бормоқда.
БМТнинг Атроф-муҳит дастури прогнозларига кўра, 2040 йилга бориб пластмасса билан боғлиқ ифлосланиш ҳажми уч баробарга ортади. Оқибатда ҳар йили жаҳон океанларига 23 миллиондан 37 миллион тоннагача пластик чиқиндилар ташланиши кутилмоқда. Бу эса нафақат денгиз экотизимларига, балки инсон саломатлигига ҳам жиддий таҳдид туғдиради. Чунки микропластиклар озиқ-овқат занжири орқали инсон организмига ўтиши мумкин.
Изоҳ (0)