Япониялик мактаб ўқувчиси отаси томонидан майдалаб юборилган 10 минг иена (65 доллар)лик қоғоз пулни тиклади. Бунинг уддасидан чиқиш учун ўсмирга 3 ҳафта керак бўлди. Воқеа билан ўқувчи ўзининг Х тармоғи саҳифасида бўлишди, деб ёзади “Правила жизни” нашри.
Томо исмли боланинг айтишича, унинг отаси пул солинган конвертни тасодифан қоғоз майдалагичдан ўтказиб юборган. Ота пулни ташлаб юборишни истамаган ва ўғлига банкнотани тиклашни таклиф қилган. Агар Томо ушбу вазифанинг уддасидан чиқса, пул унга қолишини ваъда берган.
Ўқувчи февраль ойининг бошида майдаланган қоғоз ва банкноталарни бир-биридан ажратишга киришди. Намуна сифатида у яна бир 10 минг иена банкнотани шаффоф пластик тагига ўрнатиб, устидан қоғоз бўлакларини йиға бошлади. Шунга қарамай, ҳар бир парча қоғоз пулнинг айнан қайси қисми эканлигини билиш мураккаб эди. Жумбоқни якунлашга бола 3 ҳафта вақт сарф қилди.
21 март куни Томо қисман тикланган банкнота расми билан тармоқда бўлишди. Афсуски, пулнинг кўп қисми етишмаётган эди. Бироқ Япония банклари низомига кўра, агар банкнотанинг учдан икки қисми сақланиб қолса, уни янгисига алмаштириш мумкин. Асосийси, махсус идентификация рақами ўқилиши шарт.
Март ойининг охирида Томо ва ниҳоят пулни банкка топширди ва янгисига алмаштиришга муваффақ бўлди. Х тармоғидаги изоҳларда фойдаланувчилар фикри иккига бўлинди: кимдир болакайнинг сабри ва меҳнатини мақтаса, бошқалар бундай ишларга беҳуда вақт кетказган, дея болани айблади. Шундай бўлса-да, Томо ўз мақсадига эришди ва пулни ўзи билан олиб қолди.
Изоҳ (0)