Ўзбекистонда атроф-муҳит, флора ва фаунани асраш мақсадида ҳуқуқбузарларга нисбатан катта миқдордаги жарима жазоларини қўллаш, ҳаттоки молиявий санкциялар эълон қилиш масалаларини қонунчиликка киритиш таклифлари ишлаб чиқилмоқда. Бу ҳақда 1 апрель куни Тошкент Ботаника боғида бўлиб ўтган Халқаро қушлар кунига бағишланган тадбирда Табиат ресурслари вазири Азиз Абдуҳакимов маълум қилди, дея хабар бермоқда “Дарё” мухбири.
Азиз Абдуҳакимов айтишича, сунъий чиқиндиларнинг табиатга зарарини олдини олиш мақсадида шундай тур чиқиндиларга сабаб бўлувчи ишлаб чиқаришларни камайтириш керак.
“Биз ҳозирги кунда бир нечта пластик-полимер маҳсулотларини мамлакатимизда ишлаб чиқарилишини таъқиқлаш бўйича тегишли таклифларимизни ҳукуматга тайёрлаб қўйдик”, — деди вазир.
Унинг алоҳида таъкидлашича, кўпчиликда чиқиндини табиатга ёки шаҳар кўчаларига ташлаш оддий ҳолатга айланиб қолган.
“Сингапур, Япония ёки Корея давлатлари тажрибасини ўрганадиган бўлсак, ушбу мамлакатларда сақичми ёки тамаки қолдиғи бўладими, полимер чиқиндими, уларни кўчага улоқтириш, катта миқдордаги жарима жазосига сабаб бўлади. Ҳаттоки уларга нисбатан молиявий санкциялар қўлланилади. Лекин бизда ҳали бу жорий этилмаган. Янги қонунчиликда биз айнан мана шундай чораларни ҳам эътиборга олганмиз. Булар қонунчиликка киритилади. Биз шаҳримизни, умуман Ўзбекистонимизни озода ва яшил сақлаб қолиш учун ҳам шундай чора-тадбирлар устида бош қотиряпмиз. Халқимиз орасида ‘Йиғиштирилган жой эмас, чиқинди ташланмаган жой тозадир’, деган нақл юради. Бу масалани ҳам вазирлигимизнинг шиорларидан бирига айлантирмоқчимиз”, — деди Азиз Абдуҳакимов.
Табиат ресурслари вазири айнан қонунчиликда қайси нормалар киритилаётгани ва уни бузганлик учун қандай чоралар кўрилиши ҳақида маълумот бермаган.
Маълумот учун, Маъмурий жавобгарлик тўғрисидаги кодекснинг 82, 91 ва 123-моддасида табиат ва атроф муҳитга етказилган зарар учун турли даражада маъмурий чоралар белгилаб қўйилган.
Аввалроқ Азиз Абдуҳакимов Ўзбекистонда 24 турдаги ноёб қушлар йўқолиб кетиш арафасида эканлигини айтиб ўтган эди.
Изоҳ (2)
Sharoit qilish kerakku aval,men namunali uylarda yashayman musur yashik qiyib bermaydi 5 yildan beri uyimiz musurga sasib ketadi.Musir moshin 15 kunda 1 marta keladi
Musurlarno qaqa tashaymiz bir narsani qilishdan oldin majburyatni kim oylaydi nima jarima bosa boldimi silaga.Musur yashik yoq qatta bor rasvo xama joy.Musurga pul tulaysan lekin yashik qoyib bermasmish kim qoyadi unda