Миграция агентлиги Ўзбекистон фуқароларини хориждан қайтаришда фирибгарлик кузатилаётганидан огоҳлантирди.
Қайд этилишича, хорижда ишлаб юрган ва вафот этган фуқароларнинг жасадларини Ўзбекистонга олиб келиш учун блогерлар, турли шахслар пластик карта рақамларини чиқариб, пул йиғиш акциялари ўтказаётгани кузатилмоқда.
Айрим ҳолатларда эски ёки нотўғри маълумотлар асосида одамларнинг ҳис-туйғуларидан фойдаланиб, фирибгарлик қилувчи шахслар кўпаймоқда. Уларнинг тарқатаётган маълумотлари орқали фуқаролар алданиб, пластик карталарга пул ўтказиб бермоқда.
“Бу каби хабарларни кўрсангиз, ҳеч қандай пул ўтказманг. Бу вазиятда қонуний ва ишончли йўл — Ўзбекистон Вазирлар Маҳкамаси ҳузуридаги Миграция агентлигига мурожаат қилишдир”, дея огоҳлантирди агентлик матбуот хизматри.
Миграция агентлиги агар Ўзбекистон фуқароси хорижда вафот этган бўлса, Миграция жамғармаси маблағлари ҳисобига мамлакатга олиб келинишини эслатиб ўтди.
2024 йилда хориждан 483 нафар ўзбекистонликнинг жасади ватанга олиб келинган. Жасадларни олиб келиш харажатлари, қайси давлатдан эканлигига қараб, турлича ҳисобланади. Мисол учун, Россиядан битта жасадни олиб келишга 1000 долларгача, Англиядан 4−5 минг долларгача, Япония, Кореядан эса 9 минг долларгача маблағ кетади.
Ўзбекистонда 2025 йил 1 сентябрдан бошлаб Миграция агентлиги томонидан хорижий давлатнинг қонунчилик ҳужжатларини бузиши натижасида депортация қилинган, шунингдек, Ўзбекистоннинг халқаро нуфузига ва обрў-эътиборига салбий таъсир кўрсатувчи хатти-ҳаракатларни содир этган фуқароларга доир маълумотлар Миграция жараёнларига доир маълумотларнинг ягона электрон базаси орқали юритилади. Депортация қилинган фуқаро Миграция жамғармаси ҳисобидан қайтарилганда, қайтариш харажатларни ушбу фуқародан ундириб олинади.
Изоҳ (0)