Россия футбол иттифоқи (РФС) Марказий Осиё футбол ассоциацияси томонидан ташкил этиладиган CAFA мусобақасида иштирок этмаслигини маълум қилди.
РФС бош котиби Максим Митрофанов бу ҳақда маълум қилган.
“CAFA’га расмий хат юбордик. Ҳамкасбларга миннатдорчилик билдирдик. Афсуски, таклифни рад этишга мажбур бўлдик.
Бу масала борасида қатор саволлар бор эди. Футболчиларга катта юклама тушиб кетарди. Биз камида тўртта ўйин ўтказмоқчи эдик, ҳаво эса иссиқ. Бир нечта терма жамоа қатнашишини инобатга олсак, мусобақага ажратилган муддат ҳам қисқа”, — дейди Митрофанов.
Аввалроқ Россия 9—21 июнь кунлари Тошкент ва Бишкек мезбонлигида ўтадиган CAFA мусобақасида иштирок этиши мумкинлиги ва Россиянинг “Газпром” компанияси турнирга ҳомийлик қилиши хабар қилинганди.
Мазкур мусобақада Ўзбекистон, Эрон, Қирғизистон, Тожикистон, Туркманистон ва Афғонистон терма жамоалари иштирок этади.
Изоҳ (0)