Франциянинг “Лион” клуби молиявий ҳисоботлардаги камчиликлар сабабли Франция футболи молиявий назорати ва бошқаруви миллий дирексияси (DNCG) қарори билан иккинчи дивизионга туширилди. Бу ҳақда Профессионал футбол лигасининг расмий сайти хабар берди.
RMC Sport нашрининг ёзишича, DNCG комиссияси томонидан ўтказилган йиғилишда “Лион” клубининг молиявий ҳолати батафсил кўриб чиқилган. Жараёнда клуб эгаси — америкалик бизнесмен Жон Текстор ҳам иштирок этган. Бироқ Текстор тақдим этган далиллар комиссия аъзоларини ишонтира олмаган ва натижада клубни юқори дивизиондан тушириш қарори қабул қилинган. Шунга қарамай, “Лион” ушбу қарорга апелляция киритиш ҳуқуқига эга.
Клуб расмий баёнотида раҳбарият DNCG билан яқиндан ҳамкорлик қилгани, барча талаблар бажарилгани ва ҳатто сармоялар белгиланган миқдордан ортиқ бўлгани таъкидланган. “Кристал Пэлас”даги улушни сотиш ҳисобига клубнинг молиявий ҳолати анча яхшиланган, бу эса 2025/26 йилги мавсумда Лига 1’да тўлиқ иштирок этиш учун етарли маблағ таъминлаган.
Шунингдек, “Лион” молиявий барқарорлик ва спортдаги ютуқларга — хусусан, кетма-кет икки йил Еврокубокларда иштирок этганига эътибор қаратган ҳолда, Лига 1’да ўйнаш ҳуқуқидан маҳрум этилиш қарорини тушунарсиз деб ҳисоблаяпти ва дарҳол апелляция киритишини билдирган.
Агар “Лион” апелляция жараёнида молиявий барқарорлигини исботлай олса, Олий дивизиондаги иштирокини сақлаб қолади. Акс ҳолда, клуб кейинги мавсумни қуйи дивизионда бошлашга мажбур бўлади.
Эслатиб ўтамиз, “Лион” 2024/25 йилги мавсумни Франция чемпионатида олтинчи ўринда якунлаб, Европа Лигаси йўлланмасини қўлга киритган эди.
Изоҳ (0)