Неймарсиз ПСЖда йирик ғалаба, «янги Пепе» «Лилль»га уч очко келтирди, «Монако» эса ҳамон «чўкмоқда». Лига 1 биринчи тури тафсилотлари

Футбол бўйича 9—11 август куни Франция чемпионати 2019/20 йилги мавсумининг 1-туридан ўрин олган учрашувлар бўлиб ўтди. «Дарё» эса тур тафсилотларини тақдим қилади.

«Монако»—«Лион»

Янги мавсумнинг очилиш ўйинида «Монако» ва «Лион» жамоалари ўзаро тўқнаш келди. Мазкур ўйинда «Лион» рақибига имкон қолдирмади (3:0). Учрашувдаги голларга Мусса Дембеле, Мемфис Депай ҳамда Тузар муаллифлик қилди. Ўтган мавсум бир амаллаб мусобақада жон сақлаб қолган Леонарду Жардим бошчилигдаги «Монако» ўйин борасида ёмон кўринмади, бироқ биринчи бўлимдаёқ Франсеск Фабрегаснинг четлатилиши ва савия орасидаги фарқ ўз сўзини айтмай қолмади.

«Марсель»—«Реймс»

Турнинг кичик сенсацияси Марселда рўй берди. Ўтган мавсум якунларига кўра, еврокубокларда иштирок этиш ҳуқуқидан бебаҳра қолган марселликлар ўз майдонида «Реймс»га имкониятни бой бериб қўйди (0:2). Франциялик Булае Диа ва Жанубий кореялик Сок Ҳён Чуннинг голлари меҳмонларга ғалаба келтирди.

«Монпелье»—«Ренн»

«Монпелье» ва «Ренн» жамоалари ўртасидаги учрашув ҳам қизиқарли тарзда ўтди (0:1). Дастлаб ўз дарвозасидан тўп олиб чиққан «паладинлар» иккинчи бўлимда пенальтидан унумли фойдалана олмади, бунинг устига «Ренн» бўлимнинг ярмини камчиликда ўтказганди. Мазкур ўйинда вазиятлардан фойдалана олмаслик майдон эгаларига қимматга тушди. Бироқ айни дамда «Монпелье» трансфер бозорида фаоллашган ва яқин орада бир қатор футболчиларни ўз сафига қўшиб олиши кутилмоқда.

«Лилль»—«Нант»

Ушбу ёзда бир нечта етакчисини сотиб юборган «Лилль» ўз майдонида «Нант»ни қабул қилди. Учрашувда «Лилль»нинг янги футболчиси Виктор Осимҳен дубль қайд этиб, жамоасининг ғалабасини таъминлади. Николя Пепега ўринбосар сифатида кўрилаётган 20 ёшли нигериялик футболчи илк расмий учрашувидаёқ ўзини кўрсатишга муваффақ бўлди. Ўтган мавсумни Бельгиянинг «Шарлеруа» клубида ўтказган ҳужумчини «Лилль» мазкур трансфер мавсумида «Вольфсбург»дан сотиб олганди.

ПСЖ—«Ним»

Турга якун ясаб берган баҳс Парижда бўлиб ўтди. Унда амалдаги чемпион ПСЖ «Ним» клубини йирик ҳисобда таслим этди (3:0). Эдинсон Кавани, Килиан Мбаппе ва Анҳел ди Мариянинг голлари парижликларга уч очко келтирди. Мазкур ўйинга ПСЖ Неймарни жалб қилмади, кейинги турга қадар бразилиялик футболчи жамоасини амаштириб қолиши ҳам мумкин.

Мазкур турда иккита ўйинда дуранг натижа қайд этилди, қолган барча баҳсларда ғолиб номи аниқланди. Бундан ташқари, ҳар бир учрашувда камида битта гол қайд этилди.