Telegram мессенжери каналларга хабар юбориш функциясини жорий этди. Бу ҳақда Telegram сайтида эълон қилинган янгиланиш маълумотларида айтилган.
“Энди сиз каналларга шахсий хабарлар юборишингиз, уларнинг эгалари ва администраторлари билан бевосита мулоқот қилишингиз мумкин. Контент муаллифлари ўз шахсий маълумотларини ошкор қилмасдан обуначилар билан мулоқот қилиш учун ушбу режимни фаоллаштира олади”, дейилади хабарда.
Каналга шахсий хабар юбориш учун фойдаланувчилар қуйи панелдаги хабар белгисини босишлари керак. Хабарларни канал созламаларида ёқиш мумкин.
Обуначиларнинг хабарлари интерфейс тизимида эгасининг шахсий чатларидан алоҳида кўрсатилади. Канал муаллифлари “суҳбатлар сонини чеклаш ва уларни янада мазмунли қилиш” мақсадида ҳар бир хабар учун тўлов белгилашлари мумкин.
Бошқа янгиликлар қаторида:
- мавзуларни ёрлиқлар кўринишида акс эттириш,
- овозли хабарларни қирқиш,
- суратларни яхшиланган сифатда юбориш,
- iOS қурилмаларида медиа файлларни тарихга юбориш имконияти.
Бундан ташқари, мессенжер сўровномадаги жавоблар сонини 12 тагача кўпайтирди. Шунингдек, фойдаланувчилар сўровномаларни “Севимли”ни танланганга қўша оладилар.
8 майда амалга оширилган янгиланиш доирасида Telegram бошқа фойдаланувчилардан “юлдузлар” эвазига маркетплейсда ноёб совғаларни сотиб олиш ва сотиш, бир вақтнинг ўзида бир нечта Stories жойлаштириш, узун видеоёзувларни бир нечта ҳикояларга ажратиш ва бошқа имкониятларни тақдим этди.
7 март куни Telegram Android ва iOS учун янгиланган версиясида пуллик хабарлар функциясини ишга туширди. Чатлар, гуруҳлар ва каналлардаги изоҳлар учун пулли хабарларни ёқиш мумкин. Premium обуна эгалари бундай хабарларни фаоллаштира олади.
Изоҳ (0)