Ижтимоий тармоқларда қатнов йўлида ҳаракатланиб кетаётган Onix йўловчиси машина том қисмидан белидан юқори қисмини чиқариб ҳаракатлангани акс этган видео тарқалди. Ҳолат юзасидан ЙҲХХ маълумот берди.
Унга кўра, ходимлар томонидан ўрганиш ишлари олиб борилиб, автомашина жарима майдонига олиб келинган. Йўловчининг ушбу ҳаракати Йўл ҳаракати қоидаларининг 24-бандида белгиланган тартибларга мутлақо зид ҳисобланади.
Мазкур қоидабузарлик бўйича фуқаро Маъмурий жавобгарлик тўғрисидаги кодекснинг 138-моддаси 4-қисми асосида маъмурий жавобгарликка тортилди ва баённома расмийлаштирилди.
“Биз дугоналаримиз билан Самарқанд йўлига пикник қилгани чиққан эдик. Люкдан чиқиб, видео қилган эдик. Қонунга зид эканини билмасдик, билганимизда ундай қилмасдик. Узр сўраймиз. Танишларимизга ҳам бундай қилмасликни етказамиз”, дейди қиз.
Машиналардаги “томошалар”
Бундан олдин Қорақалпоғистондаги тўйда танасини машинадан чиқариб тасвирга олган операторлар ва ҳайдовчи жаримага тортилган эди. Шунингдек, Андижонда 20 ёшли қиз машинадан танасини чиқариб ҳаракатланган.
Самарқандда ҳаракатланаётган Gentraъдан танасини чиқариб, сохта доллар сочган йигитларга чора кўрилгани тўғрисида хабар берилганди. Шу билан бирга, Фарғонада тўйда томоша кўрсатган ҳайдовчилар жазоланганди.
Андижонда қиз тунда танишининг машинасидан танасини чиқариб ҳаракатланганди.
Изоҳ (0)