Ўзбекистонда божхона расмийлаштирувидан ўтишда гибрид автомобиллар учун мажбурий экологик сертификатлаш талаби бекор қилинди. Бу ҳақда Сенатнинг 28 май куни бўлиб ўтган ялпи мажлисида маълум бўлди.
Мамлакатга олиб кирилаётган гибрид автомобилларни божхонада расмийлаштириш жараёнида “Евро-4” экологик тоифасидан кам эмаслигини тасдиқловчи экологик сертификат (нархи тахминан 2 млн сўм) талаб этилаётгани жамоатчиликда кенг муҳокамаларга сабаб бўлганди. Ваҳоланки, ушбу транспорт воситалари “Евро-5” ёки “Евро-6” экологик стандартларига жавоб берадиган электродвигателлар билан жиҳозланган ҳолда олиб кирилмоқда.
Май ойининг бошларида гибрид автомобилларни экологик сертификатлаш тартиби юзасидан сенатор сўрови юборилди.
Унда қуйидагилар бўйича тушунтириш бериш сўралган:
- республикада фаолият олиб бораётган экологик сертификатлаш органининг ташкилий-ҳуқуқий асослари, фаолиятини тартибга солиш тартиб-таомиллари;
- автомобилларни экологик стандартдан ўтказувчи аккредитациядан ўтган синов лабораториялари, уларнинг моддий-техник базаси, автомобилларни синовдан ўтказиш қамрови ва имкониятлари;
- электродвигателлар билан жиҳозланган гибрид автомобилларни расмийлаштириш жараёнида экологик сертификат олиш тўғрисидаги талабнинг меъёрий-ҳуқуқий асослари;
- аризани кўриб чиқиш, экологик сертификатлаш жараёнини амалга ошириш ва экологик сертификат бериш ёки уни беришни рад этиш юзасидан ишлар қиймати бўйича белгиланган тўлов миқдори масалаларига аниқлик киритиш.
28 майдаги ялпи мажлисда Сенат аъзоси вазирликнинг сенатор сўровига жавобида айрим маълумотлар тушиб қолгани, уларга аниқлик киритилмагани, бу туфайли сенаторлар одамларга масала юзасидан аниқ жавоб беролмаганини айтди. У мажлисда иштирок этаётган Экология вазирлиги ва Божхона қўмитаси масъулларидан ҳозирги кунда гибрид автомобилларни мамлакатга импорт қилишда экологик сертификат талаб қилинаётгани ёки йўқлиги ҳақидаги саволга аниқ жавоб беришни сўради.
Экология вазири биринчи ўринбосари Обиджон Қудратов бунга жавобан амалдаги қонунчиликка кўра, газ, бензин ва дизелда юрадиган машиналардан экологик сертификат сўралиши, лекин электромобиллар бундан озод қилинганини билдирди. Гибрид машиналар ҳақида эса аниқ норма йўқлиги сабабли тушунмовчилик келиб чиққан ва сертификат талаб қилинган.
Ҳозирда буни аниқ белгилаб қўйиш мақсадида Вазирлар Маҳкамаси қарори лойиҳаси ишлаб чиқилган ва у вазирлик ҳамда идоралар билан келишилганини, қисқа муддатда Адлия вазирлигидан ҳуқуқий экспертизадан ўтказилиб, Вазирлар Маҳкамасига киритилишини айтди. Айни вақтда мамлакатга олиб кирилаётган гибрид автомобиллардан экологик сертификат талаб қилинмаётганини билдирди.
Танзила Норбоева бунгача мазкур сертификат бўйича одамлардан тўлов ундирилганини таъкидлаб, вазир ўринбосарига бу қанчалик тўғри ёки нотўғрилигини сўради.
“Сертификатлаш бугунги кунда умуман талаб этилмаяпти. Бу масала кўтарилганда биз тегишли аниқлик киритиб, кўрсатмалар бердик. Божхона қўмитаси билан келишиб олинди. Тўлов ундирилмаслиги керак”, деди Обиджон Қудратов.
Лекин ҳозирги кунгача бундай сертификат нечта автомобилга расмийлаштирилгани ва қанча тўлов ундирилгани, пуллар уларнинг эгаларига қайтариш-қайтарилмаслигига аниқлик киритилмади.
Изоҳ (0)