Ўзбекистонда “Яшил макон” электрон платформасида очиқлик янада таъминланади. Бу борада “Яшил макон” умуммиллий лойиҳаси доирасида ҳамда ўрмонларни бошқариш тизимида ислоҳотларни изчил давом эттириш, яшил ҳудудларни кенгайтириш чора-тадбирлари тўғрисида”ги президент фармонида бир қатор чоралар белгиланди.
Фармонга кўра, дарахт ва бута кўчатларининг кўкарувчанлиги, яшовчанлиги, касаллик ва зараркунандаларга чидамлилигини оширишнинг 2026 йил 1 январдан бошлаб мақсадли кўрсаткичлари этиб қуйидагилар белгиланди:
- давлат ўрмон хўжаликларида республика ҳудудларининг иқлим шароитига мос дарахт турларининг замонавий селексия усулларидан фойдаланиб сифатли ва кафолатланган уруғларни етиштириш ҳажмини 1,5 баравар ошириш.
- уруғчилик лабораторияларида республика ҳудудларининг иқлим шароитига мос ўсимлик турларидан оналик плантацияларини ташкил қилиш;
- давлат ўрмон хўжаликлари томонидан етказиб берилаётган кўчатлар ҳажмини 2 бараварга ошириш.
2025 йил 1 октябрдан бошлаб “Яшил макон” умуммиллий лойиҳасини амалга оширишда жамоатчилик иштирокини ошириш, “Яшил макон” электрон платформасида очиқликни таъминлаш ва рақамлаштиришга қаратилган бир қатор механизмлар жорий қилинади.
Жумладан, аҳоли ташаббуси билан дарахт экилиши мумкин бўлган аниқ ҳудуд, сув таъминоти, кейинчалик парвариш қилиш имконияти ва дарахтларнинг турлари кўрсатилади. “Яшил макон” умуммиллий лойиҳасига давлат бюджетидан ажратиладиган маблағлар ҳисобидан амалга ошириладиган ишлар тўғрисидаги маълумотларни жамоатчиликка “ҳар бир тийин сарфланишини кузатиш” тамойили асосида онлайн етказилади.
Дарахт ва буталарни кесиш учун рухсатнома бериш юзасидан мурожаат қилган шахс тўғрисидаги маълумот, кўчирилиши ёки кесилиши таклиф этилаётган дарахт ва кўчириш (кесиш) сабаби, аниқ манзили, жойдашуви, фото ва видеотасвирлар акс эттирилади.
Ўрмон фондига кирмайдиган дарахт ва буталарнинг қимматбаҳо навларини қонунга хилоф равишда кесган ёки йўқ қилган шахслар томонидан компенсация сифатида экилган дарахт ва бута кўчатлари ҳисобини юритиш тизимини жорий қилинади.
Дарахтларни ноқонуний кесган жисмоний ва юридик шахслар, ушбу ҳуқуқбузарликлар ва улар юзасидан кўрилган чоралар ҳақида “Яшил макон” электрон платформасига доимий равишда маълумотлар киритиб борилади.
2025 йил 1 ноябрдан бошлаб ўрмон фонди ер майдонлари алоҳида муҳофаза этилади ва уларнинг тоифасини ўзгартириш президент қарорига мувофиқ амалга оширилади.
“Яшил макон” умуммиллий лойиҳаси ҳақида
Ўзбекистонда ушбу умуммиллий лойиҳа тўрт йил аввал бошланди. Ушбу дастур учун 2025 йилда 100 миллиард сўм ажратилди. Дарахтларни 3 йил парваришлаш, касалликдан сақлаш, суғориш харажатлари ҳам инвестиция дастурига киритилади. 2024 йилда жами 200 млн, шундан баҳор мавсумида 125 миллион туп кўчат экилиши белгиланган бўлиб, баҳор мавсумида 138,1 миллион туп (110,5 фоиз) дарахт кўчатлари экилган.
Фуқаролар фикр-мулоҳазалари, хоҳиш-истакларини атрофлича ўрганиб, билдирилган тавсиялардан келиб чиққан ҳолда, бу борадаги ишларни янги, янада юксак босқичга кўтариш мақсадида 2025 йил Ўзбекистонда “Атроф-муҳитни асраш ва яшил иқтисодиёт йили” деб эълон қилинган.
Изоҳ (0)