Смицон институтининг Америка тарихи музейи ўз экспозициясидан Дональд Трампга нисбатан амалга оширилган икки марта импичмент уриниши ҳақидаги маълумотни чиқариб ташлади. Бу ҳақда The Washington Post газетаси хабар бермоқда.
“Июль ойида Смитсон институтининг Миллий Америка тарихи музейи президент Дональд Трампнинг иккита импичменти ҳақидаги маълумотларни кўргазмадан олиб ташлади”, дейилади нашрда.
Таъкидланишича, экспозициянинг ушбу қисми 1868 йилда президент Эндрю Жонсонга, 1974 йилда Ричард Никсонга ва 1999 йилда Билл Клинтонга нисбатан ўтказилган импичмент жараёнлари ҳақидаги маълумотларни сақлаб қолган ҳолда 2008 йилги ҳолатига қайтарилган.
Ушбу хабар эълон қилинганидан сўнг, Смитсон институти “келажакдаги янгиланган экспозицияда импичментнинг барча ҳолатлари акс эттирилишини” маълум қилган.
Институт вакилларининг тушунтиришича, “Америка президентлиги: буюк масъулият янгиланишга муҳтож” кўргазмасидаги “Президент ҳокимияти чегаралари” бўлими нафақат импичментни, балки бошқа мавзуларни ҳам қамраб олади. Бу мавзулар ўша пайтдан бери янгиланмагани сабабли, “импичмент бўлимини 2008 йилги версиясига қайтаришга қарор қилинган”.
Трамп икки марта импичмент эълон қилинган ягона АҚШ президенти ҳисобланади. Биринчи марта 2019 йилда Трамп ҳокимиятни суиистеъмол қилганликда ва конгресс ишига тўсқинлик қилганликда айбланган. Сенаторларнинг таъкидлашича, президент Украинага ҳарбий ёрдам тўловини кечиктиришга уринган, бу орқали унинг ҳукумати 2020 йилги президентлик сайловларидаги эҳтимолий рақиби — демократ Жо Байденга қарши тергов очишига эришмоқчи бўлган. Сенат уни 2020 йилда оқлаган.
Трампга иккинчи марта импичмент 2021 йил 6 январда Капитолийга бостириб киришдан сўнг исёнга ундагани учун эълон қилинган. Трамп муддати тугаганидан кейин яна оқланган.
Изоҳ (0)