Болливуд актрисаси ва модел Шефали Жаривала 42 ёшида вафот этди. Бу ҳақда Indian Express газетаси полициядаги манбаларига таяниб хабар берди. Унинг ўлимига юрак тўхтаб қолиши сабаб бўлгани айтилмоқда.
Қайд этилишича, актриса косметолог қабулида ёшартирувчи укол олганидан сўнг соғлиғи ёмонлашган.
Дастлабки маълумотларга кўра, Жаривала 27 июнь куни тушдан кейин бир неча йиллардан бери мунтазам олиб келаётган ёшартирувчи препаратни қабул қилган. Кечаси Мумбайдаги квартирасида унинг қон босими кескин тушиб кетган ва титроқ бошланган. Қариндошлари актрисани зудлик билан касалхонага олиб боришган, у ерда шифокорлар актрисанинг ўлимини қайд этган.
Маълум қилинишича, Жаривала неврологик касалликдан азият чеккан ва тегишли дори-дармонларни қабул қилган. Бундан ташқари, у вафот этган куни уйида диний маросим (пужа) ўтказгани учун рўза тутган, бу эса оч қоринга қабул қилинган дориларнинг салбий таъсирини кучайтириши мумкин эди.
Полиция актрисанинг уйидаги дори-дармонларни олиб кетган ва бахтсиз ҳодиса туфайли ўлим ҳақидаги хабарни қайд этган. Тергов доирасида камида саккиз киши, жумладан, унинг эри, ота-онаси, хизматкори ва бино қўриқчиси билан суҳбатлашилган. Токсикологик экспертиза натижалари олингандан сўнг якуний хулосалар чиқарилади.
Шефали Жаривала 2000 йилларнинг бошларида бутун Ҳиндистон бўйлаб ҳитга айланган Каанта Лага (ҳинд тилидан таржима қилинган “Тиканли укол”) мусиқий видеоси чиққанидан кейин машҳурликка эришди. Кейинчалик у машҳур реалити-шоуларда, жумладан, актёр Салмон Хон томонидан ташкил этилган Bigg Boss 13 да иштирок этди.
Изоҳ (0)