АҚШ президенти Дональд Трамп Ғазо секторидаги очарчиликка қарши курашиш режаси устида ишлаётганини маълум қилди. У бу ҳақда Axios порталига берган интервьюсида айтиб ўтди.
“Биз одамларга ёрдам бермоқчимиз. Уларнинг яшашига кўмаклашмоқчимиз. Одамларнинг тўйиб овқатланишини истаймиз. Бу аллақачон амалга оширилиши керак бўлган нарса эди”, деди Трамп.
Америка раҳбари Ғазо секторидаги очарчилик ҳақидаги хабарлардан ташвишда эканлигини билдирган. У радикал Фаластин ҲАМАС ҳаракатини анклавга келаётган инсонпарварлик ёрдамини ўғирлаш ва кейинчалик сотишда айблаган.
2025 йил 2 мартдан бошлаб Ғазо секторига халқаро гуманитар ёрдам етказилмаяпти. Исроилнинг қарори билан барча назорат-ўтказиш пунктлари ёпиқ ҳолда қолмоқда. Озиқ-овқат тақсимоти эса Исроил ва АҚШ томонидан бошқариладиган Ғазога инсонпарварлик ёрдами жамғармаси пунктлари тизими орқали амалга оширилмоқда.
ҲАМАСнинг таъкидлашича, “ёрдамнинг катта қисми илгари эвакуация қилинган хавфли ҳудудларга ҳаво орқали ташланмоқда. Бу эса мазкур ёрдамни самарасиз қилади ва тинч аҳолининг ҳаётини хавф остига қўяди”.
Бундан аввал Германия ташқи ишлар вазири Йоханн Вадефул Исроилга ташрифи давомида ГФРнинг Ғазо секторидаги оч қолган аҳолига ёрдамни кенгайтираётганини ва БМТнинг Жаҳон озиқ-овқат дастурига (WFP) қўшимча 5 миллион евро ажратилишини эълон қилганди.
Илгари БМТ Жаҳон озиқ-овқат дастури Ғазо секторида озиқ-овқат истеъмолининг асосий кўрсаткичлари 2023 йил октябрь ойида можаро авж олгандан бери энг ёмон даражага етганини маълум қилган эди.
“Озиқ-овқат хавфсизлиги фазаларининг интеграциялашган таснифи” (IPC) халқаро мониторинг ташаббусига кўра, анклав аҳолисининг 39 фоизи кетма-кет бир неча кун давомида оч қолишга мажбур, 500 мингдан ортиқ киши — Ғазо аҳолисининг қарийб чорак қисми очликка яқин шароитда яшаяпти.
Исроилнинг 2023 йил октябрида Ғазога қарши бошлаган уруши оқибатида ҳалок бўлган фаластинликлар сони 60 мингдан ошди. Уларнинг қарийб 150 нафари очарчиликдан вафот этган.
Изоҳ (0)