“Исроилнинг Ғазодаги ҳаракатлари яҳудий қадриятларига зид” — нидерландиялик раввин

Нидерландиялик раввин Эдвард ван Вулен Исроилнинг Ғазо секторидаги хатти-ҳаракатлари барча яҳудий қадриятларига зид эканлигини айтди. У Исроил бош вазири Биньямин Нетаньяхуга у ердаги зўравонликни тўхтатишга чақирувчи петицияни имзолаган, деб хабар берди Volkskrant газетаси.

“Яҳудий халқи Исроил пайғамбарлари давридан бери ахлоқий овоз бўлиб келган яҳудийликнинг асосларига таҳдид соладиган жиддий ахлоқий инқирозга дуч келди. Биз бу ҳақда жим тура олмаймиз”, дейилади Нетаньяхуни Ғазодаги зўравонликка чек қўйишга чақирувчи “Бутун дунёдан раввинлар мактублари” номли петицияда.

Петицияни 1200 дан ортиқ киши имзолаган. Улардан бири раввин Эдвард ван Вулен, Амстердамдаги Яҳудий тарихи музейининг собиқ куратори, Нидерландиядаги яҳудийлар ва насронийлар маслаҳат кенгаши (ОJES) ҳаммуассисидир.

“Ғазо даҳшатли аҳволда, бу менга 1939-1945 йилларда яҳудийлар қандай даҳшатли аҳволда бўлганини эслатади. Агар ўшанда бундай кадрлар бутун дунё бўйлаб эфирга узатилганида, гарчи бу имконсиз бўлса-да, Холокостнинг олдини олиш мумкин бўларди”, дейди ван Вулен.

Раввин Исроилда кўп марта бўлганини ва “даҳшатли нарсаларни” кўрганини билдирган. Унинг сўзларига кўра, Исроил томонидан босиб олинган ҳудудларда аҳоли тенг ҳуқуқларга эга эмас.

“Мен исроилликларнинг барча яҳудий қадриятларига зид хатти-ҳаракатлар қилаётганини кўряпман. Яҳудийларнинг Муқаддас китобида айтилишича, барча одамлар Худонинг сурати ва ўхшашлигида яратилган, шунинг учун ҳамма тенгдир. Улар инсоний қадр-қимматнинг барча шаклларига ҳақлидирлар.

Яна бир буюк амримиз - яқинларингизни севиш... Бундан ташқари, Муқаддас китобдаги пайғамбарлар ҳар доим адолатсизликка қарши чиқишган. Ва бу қадриятлар Ғазо, Ғарбий Қирғоқ, Жанубий Ливан ва Сурияда исроилликлар томонидан шармандаларча топталмоқда”, деди раввин.

Ван Вуленнинг сўзларига кўра, петициядаги норозилик кўплаб яҳудийлар курашаётган нарса — таъқиблар, камситишлар ва қувғинларни акс эттиради.

Бундан аввал Исроилнинг “Бецелем” ва “Инсон ҳуқуқлари учун шифокорлар” ташкилотлари алоҳида баёнотлар билан чиқиб, мамлакат ҳукуматини фаластинликларни қирғин қилишда айблаганди.