Ўзбекистонда 2024 йил бошидан буён газ билан боғлиқ ҳолатлар сабаб 82 киши вафот этди. Бу ҳақда АОКАда ўтказилган брифингда “Ҳудудгазтаъминот” АЖ бошқарма бошлиғи Абдусаттор Қаюмов маълум қилди.
27 ноябрь куни ўтказилган брифингда қайд этилишича, жорий йил бошидан бугунги кунга қадар Республика бўйича газ билан боғлиқ жами 74 та ҳолат содир бўлди. Бунинг оқибатида вафот этган фуқаролардан ташқари 80 киши турли даражадаги тан жароҳатлари олди.
Айрим ҳолатларда эса дудбурон носозлиги оқибатида оиланинг барча аъзолари ис газидан заҳарланиб вафот этди.
“Афсуски айрим фуқароларнинг қоидаларни билмасликлари, унутиб қўйишлари, менсимасликлари ёки эътиборсизликлари бахтсиз ҳодисаларни келтириб чиқармоқда”, дейди Абдусаттор Қаюмов.
Газ билан боғлиқ кўнгилсиз ҳолатлар сони 2023 йилнинг шу даври билан таққослаганда нисбатан камайган. Ўтган йили газ билан боғлиқ жами 86 та ҳолат содир бўлган. Бунинг оқибатида 88 киши вафот этган, 119 нафари турли даражадаги тан жароҳатлар олган.
Ис газидан вафот этаётган фуқаролар
2024 йил март ойида Фарғона вилояти Бешариқ туманида бир оиланинг уч аъзоси ис газидан заҳарланиб вафот этганди. Тошкент вилоятининг Янгийўл туманида эр-хотин ис газидан ҳалок бўлди. Октябрь ойида Қорақалпоғистоннинг Нукус шаҳрида уч киши ис газидан заҳарланиб вафот этди. Ноябрь ойи бошида Андижон вилоятининг Жалақудуқ туманида 4 киши ис газидан заҳарланиб вафот этди. 12 ноябрда Бухоро вилояти Когон шаҳрида аёл ва унинг вояга етмаган фарзанди ис газидан вафот этди. 18 ноябрь куни Наманган вилоятининг Поп туманида бир оиланинг 3 нафар аъзоси ис гази қурбони бўлди.
Изоҳ (0)