Қорақалпоғистон Республикаси Чимбой туманида бир оиланинг беш аъзоси ис газидан заҳарланиб вафот этди. Бу ҳақда “Дарё”га Бош прокуратура ахборот хизмати раҳбари Ҳаёт Шамсутдинов маълум қилди.
Маълум қилинишича, “Кенуэс” ОФЙ ҳудудида яшовчи фуқаро М.Б.нинг хонадонида 15 декабрь соат 11:45 ларда ўзи ва 6 нафар оила аъзосининг ҳушсиз ҳолатда ётгани қўшнилари томонидан аниқланган. Ҳодиса жойига тез тиббий ёрдам шифокорлари чақиртирилган.
Текширув давомида ушбу хонадонда яшаган 66 ёшли М.Б., 62 ёшли З.М,, 37 ёшли С.Б., 15 ёшли А.А. ва 12 ёшли М.А. вафот этгани аниқланган.
Шунингдек, 28 ёшли Т.О. ҳамда 23 ёшли А.Б. оғир аҳволда ҳушсиз ётганлиги аниқланиб, туман тиббиёт бирлашмасига ётқизилган.
Терговга қадар текширув ҳаракатлари давомида ушбу ҳолатда ис газидан заҳарланиш аломатлари мавжуд бўлиб, уйнинг иситувчи қозонхонаси уй ичида ёниб тургани аниқланган. Мазкур ҳолат бўйича Чимбой туман прокуратураси томонидан суд-тиббиёт экспертизаси тайинланиб, терговга қадар текшириш ҳаракатлари олиб борилмоқда ва ҳодисанинг келиб чиқиш сабаблари ўрганилмоқда.
- Эслатиб ўтамиз, Ўзбекистонда 2022 йилда ис газидан заҳарланиш билан боғлиқ 90 дан ортиқ ҳолат содир бўлган.
- Бунинг оқибатида 146 киши вафот этган, яна 50 нафар фуқаро жабрланган.
Изоҳ (0)