Ўзбекистонлик аёл Бангалор шаҳридаги меҳмонхоналардан бирида ўлик ҳолда топилгани ҳақида хабар берилган эди. Ўзбекистоннинг Деҳлидаги элчихонаси вазиятни назоратга олди.
“Дунё” ахборот агентлигининг ёзишича, элчихона Бангалор шаҳри полиция идораси вакиллари билан тезкор тарзда алоқа ўрнатди ва мазкур ҳолат бўйича ойдинлик киритиш ҳаракатларини амалга оширмоқда.
Дастлабки маълумотларга кўра, 13 март куни мазкур шаҳарнинг Jagadish Hotel меҳмонхонасида Ўзбекистон фуқароси, 1997 йил Қашқадарё вилоятида туғилган З.Ж. исмли аёл ўз хонасида ўлик ҳолда топилган. Ҳозир мутасадди ташкилотлар томонидан мазкур ҳодисанинг сабаблари аниқланмоқда. Дипломатик миссиясининг консуллик бўлими ушбу жараённи ўз назоратига олган.
Элчихона томонидан зарур консуллик-ҳуқуқий ёрдам кўрсатилишини ташкил этиш мақсадида марҳуманинг оила аъзолари билан алоқа ўрнатиш чоралари кўрилмоқда.
Ўзбекистоннинг Деҳлидаги элчихонаси ушбу воқеа юзасидан маълумотга эга бўлганлардан дипмиссия консуллик бўлимига қуйидаги алоқа воситалари орқали мурожаат қилишини сўради:
- Телефон: +91 11 2467 0774/75
- Эл. почта: ин.uzembassy@mfa.uz ва инфо.uzbekembassy@gmail.com
- Telegram-бот: @consuluzbindia_bot
2024 йил январида Ҳиндистоннинг Ҳаряна штати Сонипат шаҳридаги дам олиш масканларидан бирида ўзбекистонлик аёлнинг жасади топилганди. 32 ёшли марҳума ис газидан заҳарланган деб тахмин қилинганди.
Изоҳ (0)