Тошкентда 2 июль куни Роҳат айланма йўлидаги таъмирлаш ишлари сабаб йирик тирбандликлар юзага келди.
Жумладан, Қўйлиқ кўприги, Фарғона йўли атрофида кузатилган тирбандликлар ҳайдовчилар ва йўловчиларга ноқулайлик туғдирди. Ижтимоий тармоқларда эътирозлар кўпайди. Ҳайдовчилар 2-3 километр масофани босиб ўтиш учун бир неча соатлаб йўлда қолиб кетганидан шикоят қилди. Таъмирлаш ишлари ҳақида олдиндан огоҳлантирилмагани айтилди.
Пойтахт ИИББ ЙҲХБ матбуот хизмати 24 июнь куни қурилиш-таъмирлаш ишлари олиб борилиши муносабати билан Яшнобод туманидаги Оҳангарон шоҳ кўчасида транспорт воситалари ҳаракати вақтинча тўхтатилишини маълум қилганди.
Расмий хабарда Темур Малик—Паркент—Маҳтумқули кўчалари айланма ҳаракатидан, ТХАЙ—Оҳангарон шоҳ кўчалари айланма ҳаракатигача бўлган қисми ёпилиши кўрсатилган. Ишларни бажариш дастлаб 1 июлгача давом этиши қайд этилганди. Кейинчалик унга ўзгартириш киритилиб, 4 июлгача давом этиши белгиланди.
Роҳат айланма йўлида автомобиль ҳаракати вақтинча ёпилиши сабабли, 2 июль куни ушбу ҳудуд орқали ҳаракатланувчи 26, 54, 110, 119, 128, 174-сонли автобус йўналишларининг ҳаракати ўзгартирилди.
Тошкент шаҳар транспорт ва йўл-транспорт инфратузилмасини ривожлантириш бош бошқармаси зарурат туғилганда йўналишларга қўшимча ўзгартиришлар киритилиши мумкинлигини маълум қилди.
Ижтимоий тармоқларда Роҳат айланма йўлида олиб борилаётган таъмирлаш жараёни акс этган лавҳалар тарқалди. Унда махсус техникалар ишлаётгани, айланма йўл асфалт қилингани, бироқ таъмирлаш ишлари ҳали якунига етмаганини кўриш мумкин.
Ҳозирча расмийлар ҳолат юзасидан қўшимча маълумот бермади.
Изоҳ (0)