Транспорт вазирлиги Осиё инфратузилмавий инвестициялар банки (ОИИБ) билан ҳамкорликда янги лойиҳаларни амалга ошириш масалалари муҳокама этилганини маълум қилди.
Маълум қилинишича, вазирлик ҳузуридаги автомобиль йўллари қўмитаси раиси Жамшид Турсунов ОИИБнинг инвестициялар блоки раҳбари Константин Лимитовский бошчилигидаги делегация вакиллари билан учрашди. Учрашувда автомобиль йўлларини ривожлантириш борасида банк молиявий кўмагида амалга оширилаётган лойиҳалар ва истиқболдаги ҳамкорлик йўналишлари муҳокама этилди.
Жамшид Турсунов аввало, ушбу банк билан ҳамкорликда Ўзбекистонда йирик стратегик лойиҳалар амалга оширилаётгани муносабати билан ўз миннатдорлигини билдирди. Хусусан, томонлар А380 Ғузор—Бухоро—Нукус—Бейнеу автомобиль йўлининг 150—228-километри (78 километр) қисмини реконструкция қилиш лойиҳаси доирасида амалга оширилаётган ишларнинг жорий ҳолати юзасидан фикр алмашди.
Шунингдек, Қорақалпоғистон Республикасидаги (328,1 километр) ҳамда Хоразм вилоятидаги (188 километр) умумий фойдаланувдаги маҳаллий аҳамиятга эга 516,1 километр автомобиль йўллари қисмларини тўла таъмирлаш лойиҳаси бўйича ҳамда истиқболда ҳамкорликни янада кенгайтириш юзасидан келишув амалга оширилди.
Осиё инфратузилмавий инвестициялар банки билан 2026 йил 30 июнгача амал қиладиган қарз битими имзоланган. Ушбу банк иштирокида А380 Ғузор—Бухоро—Нукус—Бейнеу автомобиль йўлининг 150 – 228-километрини реконструкция қилиш бўйича Вазиарлар Маҳкамаси қарори қабул қилинганди. Қурилиш даври 5 йил этиб белгиланган: 2 йили қуриб битказиш учун, 3 йил кафолат/техник назорат ва таъминот учун.
Мазкур лойиҳа доирасида 63,36 километр (81 фоиз) узунликдаги автомобиль йўлининг ўнг қисми ва 55,03 километр (70 фоиз) узунликдаги автомобиль йўлининг чап қисмидаги мавжуд асфалт қопламасини кесиш ишлари бажарилди. 63,30 километр (81 фоиз) узунликдаги автомобиль йўлининг ўнг қисми ва 44,04 километр (56 фоиз) автомобиль йўлининг чап қисмида қум-шағал аралашмасидан 25 сантиметр қалинликда йўл асос қатлами ётқизилди. 63,3 километр (81 фоиз) узунликдаги йўлнинг ўнг қисми ва 42,51 километр (55 фоиз) узунликдаги йўлнинг чап қисмида 20 сантиметр қалинликдаги М-75 маркали цемент-бетон аралашмаси (СТБ) билан асоснинг устки қатлами ётқизилди.
Изоҳ (0)