Янги кўприк қурилиши ишлари олиб борилаётгани сабаб 16 апрелдан Тошкент шаҳри ТХАЙ кўчасининг Қўйлиқ деҳқон бозори рўпарасидан ўтган қисмидаги йўл автомобиллар ҳаракати учун қисқаради. Бу ҳақда шаҳар ҳокимлиги ахборот хизмати хабар қилди.
Қайд этилишича, қуйидаги йўналишлар ватинча ёпилади:
- ТХАЙнинг Қумариқ—Роҳат йўналишида Қўйлиқ бозорининг кириш жойи қаршисидан 200 метр узунликда тўрт йўналишидан иккитаси вақтинча ёпилади;
- ТХАЙнинг Роҳат—Қумариқ йўналишида Compas савдо мажмуаси қаршисидаги битта йўналиши 50 метр узунликда вақтинча ёпилади.
Аввалроқ Тошкент шаҳрида таъмирлаш ишлари сабаб бир қатор кўчаларда транспорт ҳаракати вақтинча чекланади. Айрим ҳудудлар 15 апрель куни соат 06:00 гача ёпилади.
Тошкент шаҳар ҳокими Жаҳонгир Ортиқхўжаев масъулларга 10 кун муддатда Тошкентдаги асосий йўлларни таъмирлаш топшириғини берганди. «Керак бўлса, кечқурун ишлайсизлар. 10 кундан ошиб кетса, кечирилмайди. Хато қилишга ҳаққинглар йўқ», — деган шаҳар ҳокими.
Эслатиб ўтамиз, Тошкент шаҳрида Рамазон ойи кечаларидаги таровиҳ намози муносабати билан ҳар куни 18:00 дан 00:00 га қадар масжидлар яқинидаги йўллар транспорт воситалари ҳаракати учун беркитилади.
Изоҳ (0)